Kile cɛ̀nmpe fiige ɲyɛ mɛ
63
Dawuda mɛɛni là,
mà u yaha Zhuda síwage e.
2 Ei Kile,
mu u ɲyɛ mii Kileŋi,
mii na mu caa.
Mu lage na ɲyɛ mii zòmbilini na lwɔhɔ la fiige.
Mii cyeere na sóre mu kurugo
bà ɲìŋɛ niŋgaga niŋkanhaga lwɔhɔ bàa wogo maha sóre mɛ.
3 Lire kurugo,
mà mii yaha mu cyage nicɛnŋke e,
mii à na yyahe le mu i,
bà mii si mpyi si mu sífente ná mu sìnampe ɲya mɛ.
4 Ɲaha kurugo yɛ,
mu cɛ̀nmpʼà pwɔ́rɔ shìŋi na,
lire kurugo,
mii ɲwɔge sí raa mu pèente myahigii cêe.
5 Mii sí raa mu kêre na shìŋi puni i.
Mii sí na cyeyi yîrige si mu ɲáare.
6 Mii funŋke naha a sàa ɲíŋɛ mu à jwo kataan ɲjyì nintan mii à lyî a tìn.
Mii funntangawuŋi ɲwɔge sí raa mu kêre ná myahigilʼe.
7 Mà mii nizinniŋi yaha yasiniŋke na,
mii funŋʼà cwo mu na.
Mii maha sɔ̂nŋi mu na numpili puni.
8 Ɲaha kurugo yɛ,
mu u ɲyɛ mii tɛgɛfooŋi.
Mà mii yaha mu fukange ɲwɔhʼi,
mii sí funntaga myagii cêe.
9 Mii sí n-pwɔ n-kwôro mu na,
mu cyɛge fànhaɲyahaga woge sí mii cwɔhɔ.
10 Mii mbòŋi lage ɲyɛ mpiimu na ke,
pire pi tîrige ɲìŋke ɲwɔhʼi kakyaare kacyewyicuguŋke e.
11 Kàshikwɔnŋwɔtange sí n-tɛ̀gɛ pire bò,
pi kyaare sí n-pyi sigepwuunbii ɲjyìŋi.
12 Ŋka saanŋi sí funntanga ta n-yîri Kile yyére.
Mpii pi maha ɲwɔfaayi fáre Kile mɛge na ke,
pire puni sí funntanga ta.
Ɲaha kurugo yɛ,
kafinivinibii ɲwɔyi sí n-tò.