Kile u ɲyɛ yyeɲiŋke kanfooŋi
62
Mɛceŋkuruŋke yyaha yyére shinŋi,
Yedutun.
Dawuda mɛɛni là.
2 Kile kanni na mii nivyahaŋʼà naye tíiŋɛ.
Uru yyére mii munaani zhoŋi sí n-yîri.
3 Uru kanni u ɲyɛ mii kafaage ná mii shwofooŋi.
Mii saɲcwɔnsigiŋi wi,
yafyin sì n-jà mii cúnŋɔ mɛ.
4 Yii sí n-kwôro sʼa ɲcwu sùpyaŋi na zà nɔ fo tèni ndire na yɛ?
Taha yii maha wwɔ̀ u na si u kakyara si ɲcyán
bà wà maha kàsofɛɛngɛ ŋɔɔnŋʼa cyán,
lire ɲyɛ mɛ,
maha kàɲyɛpɛgɛ sanŋa waraga mɛ la?
5 Pi ɲyɛ na sɔ̂nŋi yafyin na mɛ,
fo mà u cyán a lwɔ́ u tayyerege niɲcɛnŋke e.
Kafinaare tʼà táan pi á.
Pi maha jwóŋi leni ná pi ɲwɔɲyi i,
mà li ta laŋaŋke ku ɲyɛ pi zòompii na.
Shelaa
6 Na munaa,
fyâha maa Kile ɲyii cyán.
Uru na mii à na sɔ̀nŋɔre taha.
7 Uru kanni u ɲyɛ mii kafaage ná mii shwofooŋi.
Mii saɲcwɔnsigiŋi wi,
yafyin sì n-jà mii cúnŋɔ mɛ.
8 Mii zhwoŋi ná mii pèente na yîri Kile e.
Mii kafaage fànhaɲyahaga woge
ná mii taŋwɔhɔge ku ɲyɛ Kile.
9 Yii pi ɲyɛ mii shiinbii ke,
yii yiye tíiŋɛ u na tèrigii puni i.
Yii a yii funŋɔ karigii puni yu u á,
ɲaha kurugo yɛ,
Kile u ɲyɛ wuu taŋwɔhɔge.
Shela
10 Sèeŋi na,
Adamapyiibii na ɲyɛ kafɛɛgɛ nintorogo
pi ɲyɛ a sìi yafyin mɛ.
Mu mɛɛ ká pi dùrugo yaaga ɲuŋʼi si pi duguŋkanni pɛ̀rɛge cè,
pi punʼà faha kafɛɛge na bá.
11 Yii àha yii sɔ̀nŋɔre taha kyanmpe na mɛ,
yii àha raa sɔ̂nŋi nàɲwɔhɔre yaayi ntaŋi na mɛ.
Nàfuuŋi mɛɛ ká sàa púgo,
yii àha yii sɔ̀nŋɔre taha u na mɛ.
12 Kile à kyaa niŋkin jwo
maa núru li kurugo tozhwɔnwogo mii à lógo na:
«Fànhe na ɲyɛ Kile e.»
13 Kafooŋi,
cɛ̀nmpe mú na ɲyɛ mu wumɔ,
ɲaha kurugo yɛ,
mu sí shin maha shin sâra
si ntàanna ná u kapyiiŋkilʼe.