Kileɲarage saanŋʼá
61
Mɛceŋkuruŋke yyaha yyére shinŋi.
Nde mɛɛni maha ɲcêe ná ŋkɔ̀nnɔŋi i.
Dawuda mɛɛni là.
2 Ei Kile,
na tùbilini lógo,
ma niŋgyiini cyán na ɲarage na.
3 Mà mii yaha diɲyɛŋi tɛgɛni na,
mii na mu yiri,
ɲaha kurugo yɛ,
mii fànhʼà kwɔ̀.
Kafaage ku ɲyɛ mii sì n-jà n-dùgo ku na mɛ,
sà na dùrugo kuru ɲuŋʼi.
4 Ɲaha kurugo yɛ,
mu u ɲyɛ mii taŋwɔhɔge
ná mii kàshisulukaaŋke,
si mii shwɔ na zàmpɛɛnbii na.
5 Mii la ɲyɛ si mpyi mu bage e tèrigii puni i,
si ŋwɔhɔ mu fukange ɲwɔhʼi.
Shelaa
6 Sèeŋi na Kile,
mu à mii ɲwɔfaayi ɲwɔ shwɔ.
Yaayi mu à bégelʼa yaha ma yyahafyagarefeebii yyaha na ke,
mu à yire kan mii á.
7 Shìtɔɔnwɔ kan saanŋʼá.
U shìŋi yaha u nɔ yyeɲwɔɲyi nimpaɲyi niɲyahaya na.
8 U pyi saanre e Kile yyahe taan tèrigii puni i.
Ma cɛ̀nmpe ná ma ɲwɔmɛfente yaha ti kwôro ná u e.
9 Lire e,
mii sí raa myahigii cêe sʼa mu kêre tèrigii puni i,
sʼa na ɲwɔfaayi wwû canŋa maha canŋa.