Shintíiŋi niŋkyalaŋi kileɲarage
59
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ:
«Ma hà kakyaare pyi mɛ.»
Dawuda mɛɛni là.
Tèni i Soli à sùpyire tun tʼà sà u pyɛnge kwûulo si u ta mbò ke,
lire tèni i u à nde mɛɛni yaa.
2 Mii Kileŋi,
na yige na zàmpɛɛnbii cye e,
ma a na shwɔ na kɔrɔfeebii na.
3 Na yige kakumpyiibii cye e,
ma a na shwɔ shinbuubii na.
4 Ɲaha kurugo yɛ,
pi pii pi à ŋwɔhɔ maa mii peeli.
Shinkyanyʼà vùnŋɔ pwɔ mii na,
mà li ta mii ɲyɛ a kawaa pyi mɛ,
mà li ta mii ɲyɛ a kapii pyi mɛ,
Kafooŋi Kile.
5 Mii ɲyɛ a sàa yafyin pyi pi na mɛ,
ŋka pi na fî na piye bégeli mii mbòŋi kurugo.
Yîri ŋɔɔnmpe na ma a mpa na yyére ma a ɲya.
6 Kafooŋi,
kàshicyagefoo Kile,
Izirayɛli u Kileŋi,
yîri ma a supyishiŋi puni tùn.
Ma hà sìi ɲùɲaara ta mpii shinpiibii ná núyaharafeebii na mɛ.
Shelaa
7 Pi maha núrʼa pa yàkoŋke maa ŋkwúuli pɔnɲyɔ fiige,
maa fî na mâre kànhe e.
8 Jwumpimpe kanni pu ɲyɛ pi ɲwɔyʼi,
Pi ɲwɔjwumpʼà pi kàshikwɔnŋwɔɔ fiige.
Pi maha jwo:
«Jofoo u ɲyɛ na wuu jwumpe núru yɛ?»
9 Ŋka mu wi ke Kafooŋi,
mu maha ɲcyàha pi na,
mu maha supyishiŋi puni fwɔ́hɔrɔ.
10 Mu mii ɲyɛ na wíi,
mii à cye kûru mu fànhe na,
ɲaha kurugo yɛ,
Kileŋi u ɲyɛ mii kàshisulukaaŋke.
11 Mii u Kileŋi u maha ɲwɔge mii na ke,
uru sí n-pa mii tɛ̀gɛ.
Kile sí mii pyi mii i na zàmpɛɛnbii puni ɲya pi à cwo.
12 Ma hà pi bò mɛ,
lire baare e mii shiinbii sí funŋɔ wwɔ̀ pi yyefuge na.
Ŋka,
pi caala ná ma sífente e,
ma a pi cyán.
Kafooŋi,
mu u ɲyɛ wuu tɔɔnnte yabeŋke.
13 Pi ɲwɔmugure puni na ɲyɛ kapegii.
Lire e ke,
pi yàmpeente kurugo,
pi yaha pi cû pi yábilimpii fuuyi na.
Ɲaha kurugo yɛ,
pi ɲyɛ a là bâra laŋaŋke jwumpe ná kafinaare na mɛ.
14 Mu lùyiriwuŋi u pi shi bò.
Pi kakyara fo ma kwɔ̀ pi na fee fee.
Lire e,
li sí n-cè diɲyɛŋi cyeyi puni i,
na mu Kile u ɲyɛ Yakuba shiinbiib ɲuŋɔ na.
Shela
15 Pi maha núrʼa pa yàkoŋke maa ŋkwúuli pɔnɲyɔ fiige,
maa fî na mâre kànhe e.
16 Pi maha ɲaare na mâre na yalyire caa,
pi aha mpyi pi ɲyɛ a tà ta mɛ,
pi maha ŋkunni.
17 Mii wi ke,
mii sí mɛɛ cêe si mu sífente kyaa jwo.
Ɲyɛ̀sɔɔge na,
mii sí mu cɛ̀nmpe kyaa jwo.
Ɲaha kurugo yɛ,
mu u ɲyɛ mii kàshisulukaaŋke ná mii taŋgwɔhɔge mii cwɔ̀nrɔmpe tèni i.
18 Mu u ɲyɛ mii fànhe tatage,
mii sí mɛɛ cêe si mu kêe.
Ɲaha kurugo yɛ,
mu Kile u ɲyɛ mii kàshisulukaaŋke.
Mu à ɲwɔ mii u Kileŋi.