Kile u ɲyɛ shinpiŋi sàrafooŋi
58
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ:
«Ma hà kakyaare pyi mɛ» Dawuda mɛɛni là.
2 Yii yukyaabii,
sèeŋi na yii na ɲyɛ ntìiŋi kuni i la?
Yii maha yoge kyaali supyire shwɔhɔlʼe na ɲwɔge la?
3 Mà byanhara bá la!
Yii maha ɲcwɔ́ maa ntìimbaaŋi pyi.
Yii maha ɲyahaŋgwurugoŋi yîrige kìni puni i.
4 Shinpiibii maha kumpiini lwɔ́ mà pi yaha pi nɛɛbii funɲyi i.
Kafinivinibii maha mpînni kuni na fo pi canzege.
5 Pi sɔɔnre na ɲyɛ wwò woro fiige,
pi na ɲyɛ màcwɔn ɲùɲcunnɔ fiige,
6 ŋgemu u ɲyɛ,
u ɲyɛ na wwòobii yyerefooŋi jwumpe núru,
nta raa ŋko pi yyerefeebii puni niɲcɛnŋi jwumpe mɛ.
7 Ei Kile,
pi ŋkyànhigii kyɛɛgɛ pi ɲwɔɲyi i.
Kafooŋi Kile,
ɲje cànrayi jàsanhaɲyi kyɛɛgɛ.
8 Pi pînniŋɛ bà lufoomɔ maha fwu a tòro mɛ.
Pi aha pi sintaayi dìri,
pi tàanbii pi pyi mu à jwo pi à kyɛɛgɛ.
9 Pi ɲa bà vunnambaga maha ɲa mɛ,
pi pyi mu à jwo pyàŋi niŋkwuŋi u à si,
u ɲyɛ a canŋaɲyiini ɲya mɛ.
10 Mà jwo pi ŋgure ti pyi taha ke,
mà ti nimpinre yaha,
kafenaɲjire li ti lwɔ́.
11 Shintíiŋi ká Kile ɲya u à uru nàvunŋɔ kwɔ̀ shinpiibii na,
u sí n-pyi funntange e.
U sí u tooyi jyé shinpiibii sìshyange e.
12 Lire ká mpyi,
sùpyire sí n-jwo:
«Sèeŋi na,
tɔ̀ɔn nimbwo na ɲyɛ shintíiŋi yyaha na,
Sèeŋi na,
Kile na ɲyɛ wani ŋgemu u maha yoge kyaali sùpyire ná tiye shwɔhɔlʼe ɲìŋke na ke.»