Kile u ɲyɛ u wuubii sɔ̀nŋɔre tatahage
57
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ:
«Ma hà kakyara pyi mɛ» Dawuda à li yaa,
tèni i u à fê Soli yyaha na mà sà ŋwɔhɔ ɲaŋgyige e ke.a
2 Ɲùɲaara ta na na!
Ei Kile,
ɲùɲaara ta na na,
ɲaha kurugo yɛ,
mu u ɲyɛ mii taŋwɔhɔge.
Mii sí ŋwɔhɔ mu fukange ɲwɔhʼi
fo yyefuge kʼaha ntòro.
3 Mii na Kile nìɲyiwuŋi yiri,
uru ŋgemu u maha karigii puni pyi na fûnŋuni mii á ke.
4 U sí mii zhwoŋi tùugo mii á si n-yîri nìɲyiŋi na.
U sí mii kyérege feebii ɲyɛ̀hɛŋgwurugo.
Shelab
Kile si u cɛ̀nmpe ná u ɲwɔmɛfente tùugo mii á.
5 Cànrayʼà mii kwûulo,
Mii nizinniŋi ɲyɛ supyikyaabii shwɔhɔlʼe.
Pi ŋkyànhigii na ɲyɛ tàanlii ná ŋgyahigii fiige,
pi ɲjyirigii si ɲyɛ kàshikwɔnŋwɔntanga fiige.
6 Ei Kile,
ma pèente cyêe nìɲyiŋi tɛgɛni na,
mu sìnampe pu ɲìŋke cyeyi puni ɲî.
7 Pi à kànhaŋa cyán mii yyaha na,
pòori kyaa mii i ɲcû,
pi à kacyewyige tùgo mii kuni i,
ŋka pire ninuubilʼà cwo kʼe.
Shela
8 Mii funŋkʼà ɲíŋɛ numɛ,
Ei Kile,
mii funŋkʼà ɲíŋɛ.
Mii sí mɛɛ cêe si mu kêe.
9 Ɲɛ̀,
na munaa!
Mii mpòoŋke ná mii ŋkɔ̀nnɔŋi,
yii ɲɛ̀!
Mii sí ɲyɛ̀ge ɲɛ̀.
10 Kafooŋi,
mii sí mu kêe sùpyire shwɔhɔlʼe,
Mii sí myahigii cêe si mu pêe supyishiŋi puni shwɔhɔlʼe,
11 ɲaha kurugo yɛ,
mu cɛ̀nmpʼà dùgʼà nɔ fo nìɲyiŋi tɛ̀gɛni na,
mu ɲwɔmɛfentʼà dùgo fo ɲahaɲyi nìɲyi na.
12 Ei Kile,
ma pèente cyêe nìɲyiŋi tɛgɛni na,
mu sìnampe pu ɲìŋke cyeyi puni ɲî.