Kile maha yaha u wuubii na
56
Mɛceŋkuruŋke yyaha yyére shinŋi.
Nde mɛɛni cèeŋkanni mɛgɛ ɲyɛ: «Tatɔɔngɔ mpánmpwɔrɔge niɲjwumbaage.» Tèni i Filisi shiinbilʼà Dawuda cû Gati kànhe e ke, lire tèni i u à li yaa.
2 Ei Kile,
ɲùɲaara ta na na,
ɲaha kurugo yɛ,
sùpyire na mii kyérege.
Canŋa maha canŋa,
pi na mii tùnni,
pi na ɲyɛ mii ɲwɔhʼi.
3 Canŋa maha canŋa,
mii zàmpɛɛnbii maha mii kyérege.
Mpii pi ɲyɛ na piye pêre maa mii tùnni ke,
pirʼà ɲyaha.
4 Ŋka mii aha fyá tèni ndemu i ke,
mii maha na cyɛge taha mu na.
5 Mii à Kile kêe u jwumpe kurugo.
Mii à na cyɛge taha Kile na,
mii sì n-fyá yafyin na mɛ.
Ɲaha sùpya sí n-jà n-pyi mii na yɛ?
6 Canŋa maha canŋa,
pi maha mii jwumpe labali na yu,
kapiini kanni li ɲyɛ pi funŋʼi ná mii i.
7 Pi maha ntɛ̀ɛn mii mbà e maa mii tatoroyi puni kàanmucaa,
ɲaha kurugo yɛ,
mii taboŋɔ pi caa.
8 Mà pi yaha pi à ɲcyii kapyimbaagii pyi,
pi sí n-shwɔ bɛ?
Kile,
mu lùyiriwuŋi u tire sùpyire kakyara!
9 Mu à mii tooyi tacyɛnɲyi puni cè mii canmpyaagii funŋʼi,
funŋɔ cwo na ɲyilwɔhe niŋwuŋke na.
Ku pɛ̀rɛge ɲyɛ a sémɛ mu sémeŋi i ma?
10 Mii aha mu yyere canŋke ŋkemu i ke,
mii zàmpɛɛnbii sí núru mii fye e.
Mii à yi cè na mu Kile na ɲyɛ ná mii i.
11 Mii à Kile kêe u jwumpe niɲjwumpe kurugo.
Sèeŋi na,
mii à Kafooŋi Kile kêe u jwumpe kurugo.
12 Mii à na cyɛge taha Kile na,
mii sì n-fyá yafyin na mɛ.
Ɲaha sùpya sí n-jà n-pyi mii na yɛ?
13 Ei Kile,
ɲwɔfaage mii à fáa mu á ke,
mii à yaa mii i kuru wwû.
Mii sí sáraya wwû si ntɛ̀gɛ fwù kan mu á.
14 Ɲaha kurugo yɛ,
mu à mii munaani shwɔ kwùŋi na,
maa mii tɔɔge pyi ku ɲyɛ a búrugo mɛ,
bà mii sí mpyi sʼa ɲaare mu Kile yyahe taan bɛ̀ɛnmpe na mɛ.