Núyaharafoo kileɲarage
55
Mɛceŋkuruŋke yyaha yyére shinŋi.
Nde mɛɛni maha ɲcêe ná ŋkɔ̀nnɔŋi i.
Dawuda mɛɛni là.
2 Ei Kile,
ma niŋgyiini cyán ma a na ɲarage lógo.
Mii aha mu ɲáare,
ma hà ŋwɔhɔ na yyaha na mɛ.
3 Lógo na ɲwɔ na,
ma a na ɲwɔ shwɔ.
Mii funŋke naha a pɛn yyefuge cye e fo mii na ŋkyɛ̀n,
4 mii zàmpɛɛnbii jwumpe kurugo,
ná shinpiibii pege kurugo.
Pi na kapii pyi mii na.
Pi lùyiriwuubilʼà cwo mii na.
5 Mii zòmbilini na ŋkùre mii funŋke e,
kwùŋi fyagare na ɲyɛ mii na.
6 Mii à fyá na ɲcyɛ̂ɛnni,
zòŋkwɔnɲcyaanre na ŋko si mii bò.
7 Ɲyɛ,
ka mii i jwo:
«Ká mpyi mii mpyi na si n-jà fukanɲya yige mpámpwɔrɔgɔ fiige,
mii mpyi na sí n-yîri n-sà n-tɛ̀ɛn tacɛnŋʼi.
8 Mii mpyi na sí n-fê n-kàre tatɔɔnge e
si sà n-tɛ̀ɛn síwage e.
Shelaa
9 Mii mpyi na sí n-fyâa n-kàre n-sà taŋwɔhɔgɔ cya
kafebwɔhe ná zànhe kafebwɔhe yyaha na.»
10 Kafooŋi,
na zàmpɛɛnbii jwumpe wùrugo,
maa pi funŋɔ kani fyìinnɛ,
ɲaha kurugo yɛ,
mii naha a yafyin ɲya kànhe e ntanhaŋi ná yoge kàntugo na mɛ.
11 Pìlaga bâra canŋa na,
cyire karigii cyi à kànhe mâhana ŋkunuŋɔ.
Ntìimbaaŋi ná yyefuge ku ɲyɛ kànhe e.
12 Kànhe pyɛnkuuŋʼà ɲî kakyaare na,
kyanmpe ná nàɲwɔhɔre ɲyɛ a sìi na ŋkwùu tabinniyi i mɛ.
13 Ká mpyi mii zànmpɛn u mpyi na mii fare,
mii mpyi na sí li kwú naye e.
Mii kyalʼà pɛn ŋgemu á ke,
ká mpyi uru u mpyi a yîri mii fye e,
mii mpyi na si n-jà ŋwɔhɔ u na.
14 Ŋka mu wi,
mii ná mu ŋgemu u ɲyɛ shinnuu,
maa mpyi cevee ná wwoɲɛɛ ke.
15 Mii ná mu ŋwòŋi mpyi a táan sèlʼe,
siɲcyan wuu mpyi maha bâra shinɲyahare na maha ŋkàre Kileɲaarebage e.
16 Kwùŋi u pâlʼa cwo pi na,
pi ɲyii wuubii pi le fanŋke e,
ɲaha kurugo yɛ,
pege na ɲyɛ pi pyɛnyi ná pi zòmpyaagilʼe.
17 Mii wi ke,
Kile mii ɲyɛ na yiri.
Kafooŋi Kile sí mii shwɔ.
18 Yàkoŋke,
ɲyɛ̀ge,
ná canvwuge na,
mii maha mpaare maa ŋkyɛ̀n,
u mú maha yi núru.
19 Kàshige kʼà bégele mii mɛɛ na ke,
u sí mii shwɔ kuru na,
si yyeɲiŋke kan mii á,
mii tunveebii mɛnʼa ɲyaha ke.
20 Kile sí n-lógo mii ɲwɔ na si pi silige,
uru u ɲyɛ u Saanre e fo tèemɔni i.
Shela
Pire pi ke,
pire ɲyɛ na ɲɛɛgʼa pi toroŋkanni kɛ̂ɛnŋɛ mɛ,
pi ɲyɛ a sìi na fyáge Kile na mɛ.
21 Mii wwòɲɛɛŋi maha kapiini pyi u ceveebii na,
cempe ɲwɔmɛɛni u à lwɔ́ ke,
u maha lire kɛ̀ɛgɛ.
22 U jwumpʼà wɔɔgɔ nùyyeŋi na,
ŋka kàshige ɲyɛ u zòmbilini na.
U jwumpe yatanɲyʼà pi sìnmɛ fiige,
ŋka pu na ɲyɛ mu à jwo ŋwɔɔ lʼà wwû li fwuuni i.
23 Ma karigii puni le Kafooŋi cye e,
u sí n-yaha mu na.
U sì ɲɛɛ shintíiŋi yaha u cwo a kwôro mɛ.
24 Mu Kile wi ke,
mu sí pi tîrige fanŋke e.
Mpii pi ɲyɛ na boore ná nàɲwɔhɔre pyi ke,
pire sì ali pi shìŋi canmpyaagii niŋke ta mɛ.
Ŋka,
mii wi ke,
mii à na sɔ̀nŋɔre taha mu na.