Kile à mii shwɔ shinpiibii na
54
Mɛceŋkuruŋke yyaha yyére shinŋi.
Nde mɛɛni maha ɲcêe ná ŋkɔ̀nnɔŋi i.
2 Dawuda à nde mɛɛni yaa,
tèni i Zifubilʼà sà Soli pyi na Dawuda à ŋwɔhɔ pire shwɔhɔlʼe ke.
3 Ei Kile!
Na shwɔ ma mɛge cye kurugo
ma sífente cyêe maa na pyi tànga foo.
4 Ei Kile!
Na ɲaarage lógo,
ma niŋgyiini cyán na jwumpe na.
5 Zànmpɛɛnbilʼà yîri mii fye e,
shinpiibii na mii munaani caa raa wwû.
Tire sùpyire ɲyɛ a Kile wíi yaaga mɛ.
Shelaa
6 Ŋka Kile u ɲyɛ mii tɛgɛfooŋi.
Kafooŋi kanni u ɲyɛ ná mii i.
7 Kapiini mii zàmpɛɛnbii la ɲyɛ si mpyi mii na ke,
li núruŋʼa tɛ̀gɛ pi na.
Ma ɲwɔmɛfente cyêe,
maa pi shi bò
8 Mii sí funntanga sáraga wwû mu á,
Kafooŋi Kile,
mii sí mu mɛge kêe,
ɲaha na yɛ,
mu à ɲwɔ.
9 Mu à mii yyefugo karigii puni láha mii na.
Numɛ,
mii à mii ɲyɛ mii à jà na zàmpɛɛnbii na.