Kilecembaabii nùmpanŋke ɲyɛ silige
53
Mɛceŋkuruŋke yyaha yyére shinŋi.
Dawuda kàlaŋi mɛɛni là.
Mɛɛni lʼà cêe ná tìnmpini i ke.
2 Funŋɔbaashiinbii na ŋko piye funŋʼi:
«Kile ɲyɛ mɛ.»
Pi à fwɔ́nhɔ,
Pi à kafunŋii pyi,
kacɛnnɛ pyifoo ɲyɛ a sìi mɛ.
3 Kile à tɛ̀ɛn nìɲyiŋi na maa ɲùŋke sôgo maa sùpyire wíi
ká mpyi yákilifoo na ɲyɛ pi e,
ŋgemu u ɲyɛ na Kile caa ke.
4 Pi punʼà kuɲcɛnni yaha,
pi punʼà fwɔ́nhɔ.
Pi wà ɲyɛ na kacɛnnɛ pyi mɛ,
ali shin niŋkin.
5 Mpii pi ɲyɛ na kakuuyi pyi ke,
taha pi ɲyɛ a yafyin cè mɛ?
Pi na mii shiinbii lyî yalyige fiige,
pi mú ɲyɛ a sìi na Kile mɛge yiri mɛ.
6 Ɲyɛ,
zòŋkwɔnɲcyaanre sí pi ta,
mà ta fyagara kyaa ɲyɛ a pyi mɛ,
Ɲaha kurugo yɛ,
Kile sí u shiinbii kyéregefeebii kaciiyi cɛɛgɛ.
Yii sí silige nimbwɔhɔ pyi ku pi ta,
ɲaha kurugo yɛ,
Kile sí ɲcyé pi na.
7 Jo u sí n-yîri Siyɔn e si Izirayɛli shiinbii shwɔ yɛ?
Kile ka Izirayɛli shiinbii núruŋʼa tìŋɛ tèni ndemu i ke,
Yakuba tùluge shiinbii sí raa yógore,
Izirayɛli shiinbii sí n-pyi funntange e.