Nàfuuŋi lapege fooŋi
52
Mɛceŋkurunŋke yyaha yyére shinŋi.
Dawuda kàlaŋi mɛɛni là.
2 U à nde mɛɛni yaa tèni i Edɔmi shinŋi Dohegi à sà yi jwo Soli á na Dawuda à jyè Ayimelɛki pyɛnge e ke.
3 Mu u à maye pyi kàshikwɔnmpege ke,
ɲaha na mu ɲyɛ na maye pêre ma pege kurugo yɛ?
Li cè na Kile cɛ̀nmpe ɲyɛ na ŋkwùu mɛ.
4 Mu ɲjini maha kakyaare pyi ŋwɔɔ ɲwɔtanga fiige.
Li maha nàɲwɔhɔre pyi.
5 Kapiinʼà táan mu á kacɛnni na.
Kafinaarʼà táan mu á mà tòro sèeŋi na.
Shelaa
6 Ŋkɛ̀gɛŋi jwumpe kanni pʼà táan mu á,
mu ɲjini na nàɲwɔhɔre pyi.
7 Lire kurugo,
Kile sí mu shi bò feefee,
u sí mu dìri n-yige ma bage e,
si mu ndìre dìri ŋwwû ɲyiishiinbii shwɔhɔlʼe ɲìŋke na.
Shela
8 Mpii pi à tíi ke,
pire sí lire ɲya si fyá,
pi sí mu fwɔ́hɔrɔ si jwo:
9 «Shinŋi u mpyi u ɲyɛ a Kile pyi u taŋwɔhɔge mɛ,
ná u mpyi a u sɔ̀nŋɔre taha u nàfubwɔhe na,
ná u mpyi na sɔ̂nŋi na uru fànhʼà ɲyaha u pege mpyiŋi kurugo ke,
uru u ŋge.»
10 Ŋka mii wi ke,
mii na ɲyɛ Kile bage e mu à jwo Oliviye cige ŋkemu kʼà fûn ke.
Mi à na sɔ̀nŋɔre taha Kile cɛ̀nmpe na tèrigii puni i fo tèekwombaa.
11 Mii sí raa fwù kaan mu á tèrigii puni i ma kapyiini kurugo.
Mii sí na sɔ̀nŋɔre taha mu mɛge na,
mu shiinbii ɲyii na,
ɲaha na yɛ,
mu à ɲwɔ.