Kile mii à kapii pyi mu na
51
Mɛceŋkuruŋke yyaha yyére shinŋi.
Dawuda mɛɛni là.
2 Tèni i Dawuda à jacwɔɔre pyi ka Kile Tùnntunŋi Natan sí n-pà u yyére ke,
lire tèni i u à nde mɛɛni yaa.
3 Ei Kile!
Ɲwɔ na na ma cɛ̀nmpe kurugo,
na kapegigii láha na na ma ɲùɲaare tɛgɛlɛbaa woore kurugo.
4 Na jyé a yige na kaɲwɔhɔyi puni i,
maa na fíniŋʼa yige na kapegilʼe.
5 Mii à li cè na mii à mu kafuun pyi,
pìlaga bâra canŋa na mii kapiini nimpyiini ɲyɛ mii funŋʼi.
6 Mii à kapii pyi mu na,
mu kanni na mii à li pyi,
mii à mu mumpɛnmpe pyi.
Lire e,
nde mu à lwɔ́ maye funŋʼi si mpyi ke,
lirʼà tíi,
sùpya sì n-jà mu cɛ̂ɛgɛ lire mpyiŋi i mɛ.
7 Mii à li cè na mii à si ná kapiini i.
Mii nuŋʼà mii si amuni.
8 Ŋka nde mu ɲyɛ na ɲcaa sùpyaŋi i ke,
lire li ɲyɛ sèeŋi u ta u zòŋi i,
na yaha si yákilifente ta.
9 Na jyé a fíniŋɛ ná hisopea cige wyɛɛre e.
Na jyé bà mii si mpyi si fíniŋɛ koombyimpe na mɛ.
10 Na yaha si funntanga myahigii lógo taceeŋke e.
Lire e kaciiyi mu à kyɛɛgɛ ke,
yire sí raa ŋkwɔ̂hɔli ná funntange e.
11 Kàntugo wà na ntìimbaaŋi na,
na kapegigii puni cwuugʼa láha na na.
12 Ei Kile!
Zò niɲcɛnŋɛ le nʼi
maa funŋɔ nivɔnŋɔ kan na á.
13 Ma hà na laage tɔɔn maye na mɛ,
ma hà ma Munaani shwɔ na na mɛ.
14 Na zhoŋi funntage le nʼi.
Ma ɲyii wuuni mpyiŋi lage le nʼi.
15 Mpii pi à cyé mu na ke,
mii sí mu kuni le pire taan,
lire e kapiimpyibii si núru mpa mu á.
16 Ei Kile!
Mii shwofooŋi Kile,
na kapiinib tugure láha na na,
bà mii si mpyi si mu mɛtange yyere na ɲjini na mɛ.
17 Kafooŋi,
na ɲwɔseeyi múgo,
na ɲwɔge sʼa ma kêre.
18 Sárayi ɲyɛ na mu funŋke tánge mɛ,
lire baare e,
mii mpyi na sí yà wwû mu á.
Ali sárage kʼà súugo feefee ke,
kuru ɲyɛ a táan mu á mɛ.
19 Kile,
sárage na mu ɲyɛ na ɲcáa ke,
kuru ku ɲyɛ,
sùpyaŋi u uye tîrige,
Kile,
ŋgemu u zòmbili lʼà u cɛ̂ɛgɛ ka u u uye tîrige ke,
mu ɲyɛ a sìi na ɲcyíge urufoo na mɛ.
20 Ɲwɔ Siyɔn na ma cɛ̀nmpe kurugo,
maa Zheruzalɛmu ŋkunuɲyi yyéeŋɛ sahaŋki.
21 Lire e ntìiŋi sárayi yʼà wwû ke,
mu sí ɲɛɛ yire na,
yire yi ɲyɛ sárayi nizoogoyi ná yi sanyi.
Lire pyiŋkanni na,
wuu sí n-jà raa nupyagii kaan mu á ma sárayi tawuuge e.