Sárage kʼà táan Kile á ke
50
Azafu mɛɛni là.
Siŋi Punifoo Kile,
Kafooŋi Kile à jwo.
U à ɲìŋke yyere mà lwɔ́ canŋafworompe na
mà sà nɔ canŋacwumpe na.
2 Siyɔn kànhe sìnampʼà fûnŋɔ
Kile sìnampe na ɲî na fwore kuru kànhe funŋke e.
3 Wuu Kileŋi wa na ma,
u sì n-pyi ɲjwumbaa mɛ,
nabwɔhe na súuge na wà u yyaha na,
kafebwɔhe sí ɲyɛ u kàmpanɲyi puni na.
4 U à nìɲyiŋi yyerʼa yîri nìɲyiŋi na,
maa ɲìŋke yyere,
bà u si mpyi si u shiinbii sâra si ntàanna ná pi kapyiiŋkilʼe mɛ.
5 U à jwo:
«Yii na yyahafyagarefeebii yyerʼa bínni,
pire mpimu pi à tunmbyaare le ná mii i
sárayi cye kurugo ke.»
6 Nìɲyiŋi na Kile ntìiŋi kyaa yu,
ɲaha kurugo yɛ,
Kile yabiliŋi u sí supyire sâra si ntàanna ná pi kapyiiŋkilʼe.
Shelaa
7 Mii shiinbii,
yii a núru,
mii sí n-jwo ná yii e.
Izirayɛli,
mii sí mu cɛ̂ɛgɛ,
mii u ɲyɛ Kile,
mu u Kileŋi.
8 Mii sì mu cɛ̂ɛgɛ ma sárayi kurugo mɛ,
ɲaha kurugo yɛ,
mu sárayi nizogoyi na ɲyɛ mii yyahe taan tèrigii puni i.
9 Mii sì n-sìi nupee cû mu pyɛnge e,
lire ɲyɛ mɛ,
mà sikapɛrii cû mu sikabayi i mɛ.
10 Ɲaha kurugo yɛ,
sige yaare puni ɲyɛ mii woro,
mà bâra yatɔɔrɔ kampwɔhii niɲyahagii,
ntemu ti ɲyɛ ɲaɲyi ɲuŋʼi ke.
11 Mii à ɲaɲyi saɲcyɛɛnre puni cè,
ɲyii yaare ti ɲyɛ sige e ke,
tire puni na ɲyɛ mii woro.
12 Ká mpyi katege mpyi mii na,
mii mpyi na si yi jwo mu á mɛ,
ɲaha kurugo yɛ,
diɲyɛŋi ná u funŋɔ yaayi puni
na ɲyɛ mii wuyo.
13 Taha mii sí nupyɛhigii kyaare kyà la?
Taha mii sí sikaperigii sìshyange bya la?
14 Fwùŋi pyi sáraga ma kan Kile á
ma a ma ɲwɔfaayi wwû nìɲyiŋi u Kileŋi á.
15 Lire ká mpyi,
mu aha ɲcwɔ̂nrɔ ma a na yyere,
mii sí mu shwɔ,
mu mú sí mii pêe.
16 Ŋka Kile sí yi jwo shinpiŋʼá:
«Ɲaha na mu na mii toŋi karigii yu
maa mii tunmbyaare kyaa yu ma ɲwɔge e kanna yɛ?
17 Mii yɛrɛyʼa pɛn mu á,
mu maha mii jwumpe wàa maye kàntugo.
18 Mu aha nàŋkaawa ɲya,
mu maha ntílʼa pyi uru kapyiɲɛɛ,
mu maha jacwoobii pyi ma wwoɲɛɛ.
19 Mu maha ma ɲwɔge leni kapiini i,
mu ɲjini na finni.
20 Mu aha ntɛ̀ɛn,
mu maha ma cìnmpworoŋi yu,
mu maha ma sìɲɛɛŋi mɛge kɛ̀ɛge.
21 Mu à cyire karigii pyi,
mii ɲyɛ a jwo mɛ,
ka mu u wa na sɔ̂nŋi na mii na ɲyɛ mu fiige.
Ŋka mii sí mu faha numɛ,
si mu kapyiiŋkii nintiimbaagii jwo ntahala cyiye na mu ɲyii na.
22 Yii pi à funŋɔ wwɔ̀ Kile na ke,
yii mpe cè,
bà mii si mpyi,
mii àha ŋkwɔ̀ yii sulugo sulugo,
yii i mpyi shwofoo bàa mɛ.
23 Ŋgemu ká fwùŋi pyi sáraga mà wwû mii á ke,
urufolʼà mii pêe.
Ŋgemu ká yaha uye toroŋkanni na ke,
mii sí li cyêe urufoo na,
na mii Kile u ɲyɛ urufoo shwofooŋi.»