Wuu àha wuu sɔ̀nŋɔre taha nàfuuŋi na mɛ
49
Mɛceŋkuruŋke yyaha yyére shinŋi.
Kore jyaabii mɛɛni là.
2 Supyishiŋi puni,
yii lógo.
Ɲìŋke sùpyire puni,
yii niŋgyigigii pɛrɛ,
3 shinbileere bâra shinbwo na,
nàfufoo bâra fòŋofoo na.
4 Mii ɲwɔge sí yákilifente jwumpe jwo,
mii funŋke sʼà ɲî ɲcèŋi na.
5 Mii à niŋgyiini cyán maa yákilifente jwumpe lógo.
Ŋkɔ̀nnɔŋi tùnmpe na,
mii sí pu kaŋwɔhɔni là yyaha jwo.
6 Yyefuge canŋke ká nɔ,
mii zàmpɛɛnbii ká pi ntìimbaaŋi karigii tɛ̀gʼa mii kwûulo,
ɲaha kurugo mii sí raa fyáge yɛ?
7 Pi à pi sɔ̀nŋɔre taha pi cyeyaayi na,
pi maha kàsimɛɛŋkii yogolo ná pi nàfuɲyahage e.
8 Ŋka pi wà sì n-jà u shinɲɛɛ múnaa ɲuŋɔ wwû,
lire ɲyɛ mɛ,
mà u yabiliŋi múnaani ɲùŋgwulwɔɔre kan Kile á mɛ.
9 Sùpyaŋi múnaani ɲùŋgwulwɔɔrʼà ɲyaha,
sùpya sì n-sìi n-jà li lwɔɔre ta mɛ.
10 Pi sì n-kwôro shì na tèrigii puni i
si shwɔ fanŋke na mɛ.
11 Wuu maha li ɲya na yákilifooŋi maha ŋkwû,
sìcyerefooŋi ná sìɲcoŋke mú maha ŋkwû
maa pi cyeyaayi yaha pibɛrilʼá.
12 Pi maha sɔ̂nŋi na pire pyɛnɲyi na sí n-kwôro fo tèekwombaa,
na pire bayi sí ŋkwôro wani tèrigii puni i.
Pi maha pi mɛyi le pi taare na.
13 Ŋka sùpyaŋi mɛɛ ká mpyi mɛgɛfoo,
u shìŋi ɲyɛ a tɔɔn mɛ.
U sí n-kwû yatɔɔgɔ nimboŋɔ fiige.
14 Sùpyire tʼà dá pi na ke,
amuni pire sí n-pyi.
Mpii pi à ɲɛɛ pi jwumpe na ke,
amuni pire mú sí n-pyi.
Shelaa
15 Pi na pi ŋɔɔŋi mpàkuruŋɔ fiige na wá kwùŋʼá.
Kwùŋi na pi nâha mpànahawa fiige.
Shintíibii sí pi fwòoŋɔ pi tooyʼe ɲyɛ̀ge na.
Pi sìnampe sí n-pînni fanŋke e.
Tatɛɛngɛ saha sì n-pyi pi á mɛ.
16 Ŋka Kile sí mii múnaani shwɔ kwùŋi numpini na,
ɲaha kurugo yɛ,
u sí mii lwɔ́ nde u fukange ɲwɔhʼi.
Shela
17 Mu aha wà cyeyaara ɲya tʼà púgo,
ka u pyɛnge si ɲî yacɛnɲyi na,
lire kà ma fyá mɛ.
18 Ɲaha kurugo yɛ,
u aha ŋkwû,
u sì n-kàre ná yafyin i uye cye e mɛ.
U cyeyaayi sì n-taha u fye e si n-jyè fanŋke e mɛ.
19 Mà u yaha shì na,
u sí n-jà n-jwo na uru canmpyaagilʼà táan uru na.
Pi mú mpyi na sí raa u kêre u yaarafente kurugo.
20 Lire ná li wuuni mú i,
u sí n-kàre u tulyeyi tashage e.
Pire saha sì n-sìi bɛ̀ɛnmpe ɲya mɛ.
21 Sùpyaŋi ká mpyi nàfufente e,
u ɲyɛ na ɲcìnʼa jwo uru sí n-kwû yatɔɔgɔ nimboŋɔ fiige mɛ.