Kile kànhe Siyɔn
48
Kore jyaabii mɛɛni là.
2 Kafooŋi Kile à pêe,
u à yaa ná ŋkèeŋi shiŋi puni i wuu Kileŋi kànhe e,
u ɲaŋke niɲcɛnŋke ɲuŋʼi.
3 Kuru ɲaŋke lemʼà sàa ɲwɔ,
ku mɛgɛ ɲyɛ Siyɔn,
ku maha ɲìŋke sùpyire puni funŋke táan.
Ku ɲyɛ suumɔ kùlʼe,
Sanbwɔhe kànhe ki.
4 Kile à uye cyêe wuu na Siyɔn kàshisulu bayi i
na uru u ɲyɛ taŋwɔhɔge.
5 Saanbii mpyi a wà piye na,
maa mpa kànhe mɛɛ na.
6 Ŋka pi à ta naha a ku ɲya ke,
ka li i pi kakyanhala,
ka pi i fyá,
maa fê.
7 Ka cyɛ̀ɛnge si ntílʼa pi ta
mu à jwo layirili foo,
8 mu à jwo kafebwɔhe ku maha yîri canŋa fyìnmpe e na fwu
maha bakwobwoyi kyɛɛge ke.
9 Nde wuu mpyi a lógo ke,
wuu à lire ɲya
kàshicyagefoo Kafooŋi kànhe e,
wuu Kileŋi kànhe e.
Kile sí fànha le kuru kànhe e tèrigii puni i.
Shelaa
10 Kile,
mà wuu yaha mu pêe pêe bage e,
wuu maha sɔ̂nŋi mu cɛ̀nmpe na.
11 Kile,
mu ŋkèeŋʼà nɔ ɲìŋke cyeyi puni i
bà mu mɛge ɲyɛ mɛ.
Mu kàniŋɛ cyɛgʼà ɲî ntìiŋi karigii kanni na.
12 Siyɔn ɲaŋke ku pyi funntange e,
Zhuda kànɲyi yʼa múguri
mu sùpyire sàraŋkanni kurugo mà tàanna ná ti kapyiiŋkilʼe.
13 Yii ɲaarʼa Siyɔn kànhe mâhana
yii i ku batɔɔnyi tɔ̀rɔ ɲjemu yʼà sogolo yiye ɲuŋʼi nìɲyiŋi i ke.
14 Yii ku kàshisulu ŋkunnuɲyi kàanmucya
yii i ku kàshisulu bayi yalʼa wíi
bà yii sí mpyi si jà mpa yi yyaha jwo tùluge nimpaŋkʼá mɛ,
15 na uru Kileŋi u ɲyɛ wuu Kileŋi tèrigii puni i,
uru mú u sí wuu yyaha cû wuu shìŋi canmpyaagilʼe tèrigii puni i.b