Kile wuubii yyefuge
44
Mɛceŋkuruŋke yyaha yyére shinŋi.
Kore jyaabii kàlaŋi mɛɛni là.
2 Ei Kile,
nde mu à pyi wuu tulyeyʼá taɲjaaŋi i ke,
wuu niŋgyiigilʼà lire lógo,
wuu tulyeyʼà li jwo wuu á.
3 Mu yabiliŋi u à supyishiŋi sanŋi kɔ̀rɔ maa wuu tulyeyi tìŋɛ,
mu à supyishiŋi wà tùn maa wuu tulyeyi tìŋɛ pire tatɛɛnɲyi i.
4 Pi kàshikwɔnŋwɔhigii bà cyi à lire kìni fente kan pi á mɛ.
Pi yábilimpii cyeyi fànhe bà kʼà pi pyi pi à jà li na mɛ,
mu cyɛge fànhaɲyahaga woge ná mu sífente ná mu cɛ̀nmpe pʼà lire pyi.
Ɲaha kurugo yɛ,
pi kyaa mpyi a táan mu á.
5 Mu u ɲyɛ mii Kileŋi ná mii Saanŋi,
Yakuba shiinbii yaha pi pyi jàvee.
6 Mu fànhe cye kurugo wuu sí n-jà wuu zàmpɛɛnbii kɔ̀rɔ,
mu mɛge cye kurugo,
wuu maha wuu tunveebii fwòoŋɔ wuu tooyi ɲwɔhʼi.
7 Ɲaha kurugo yɛ,
mii ɲyɛ a na sɔ̀nŋɔre taha na sintaage na mɛ,
mii kàshikwɔnŋwɔɔni bà li sí mii shwɔ mɛ.
8 Mu u maha wuu shwuu wuu zàmpɛɛnbii na,
maa wuu màpɛngefeebii sílige.
9 Wuu maha fwù kaan Kile á canŋa maha canŋa
maa u mɛge kêre tèrigii puni i.
Shelaa
10 Lire ná li wuuni mú i,
mu à wuu cyé maa wuu sílige wuu zàmpɛɛnbilʼá.
Mu saha ɲyɛ na sì ná wuu kàshikwɔɔnbilʼe mɛ.
11 Mu à wuu pyi wuu à fê wuu kàshikwɔnɲɛɛbii yyaha na.
Wuu zàmpɛɛnbilʼà wuu cyeyaayi kuu pi ɲɛɛmpe.
12 Mu à wuu le pi cye e mpàa nimbomii fiige,
maa wuu bwɔ̀n a caala supyishiŋi shwɔhɔlʼe.
13 Mu à ma shiinbii pɛ́rɛ loɲcwɔn na,
mu ɲyɛ a sàa là ta pi e mɛ.
14 Mu à wuu pyi katanra yaaya wuu tɛnɲɛɛbilʼá,
maa wuu pyi ɲjirivaha yaaya wuu kwùumpe shiinbilʼá.
15 Mu à supyishiŋi sanŋi yaha u à wuu kani pyi ŋwɔhɔŋɔ na yu,
maa nàmpwuunbii pyi pi i ɲùɲyi kwòre na wàa wuu na.
16 Silige na ɲyɛ mii na tèrigii puni i,
mii à sílige fo mà mii ɲùŋke sôgo.
17 Mii cyahigii ná mii fahante ti ɲyɛ
mii zàmpɛɛnbii ná mii lùuni yîrigefeebii ɲwɔyʼi tèrigii puni i.
18 Cyire punʼà pyi wuu na,
ŋka wuu ɲyɛ a funŋɔ wwɔ̀ mu na mɛ,
wuu ɲyɛ a mu tunmbyaare kɛ̀ɛgɛ mɛ.
19 Wuu funɲyi ɲyɛ a wuu kɛ̂ɛnŋɛ mɛ,
wuu tooyi mú ɲyɛ a fworo mu kuni i mɛ.
20 Ŋka mu à wuu kyɛɛgɛ mà yaha sigepwuun tatɛɛngɛ,
maa wuu tò ná kwùŋi numpini i.
21 Ká mpyi wuu mpyi a funŋɔ wwɔ̀ wuu Kileŋi na,
ká mpyi wuu mpyi a wuu cyeyi yîrige maa yaage kabɛrɛ pêe,
22 Kile mpyi na si yi cè mà?
Ɲaha kurugo yɛ,
uru u à sùpyaŋi funŋɔ kaŋwɔhigii cè.
23 Wuu na bùu mu kurugo canŋa maha canŋa,
wuu na ɲyɛ mu à jwo mpàa nimbomii.
24 Kafooŋi,
yîri.
Ɲaha na mu na ŋwúunni yɛ?
Yîri,
ma hà wuu wà n-yaha tèrigii puni i mɛ.
25 Ɲaha na mu à ma yyahe ŋwɔhɔ wuu na yɛ?
Ɲaha na mu à funŋɔ wwɔ̀ wuu yyefuge ná wuu kanhare na yɛ?
26 Wuu à myîgimɛ pwoore e,
wuu à cûru ɲìŋke e.
27 Yîri maa wuu tɛ̀gɛ.
Wuu shwɔ ma cɛ̀nmpe kurugo.