Saanŋi cikwɔɔnre mɛɛni
45
Mɛceŋkuruŋke yyaha yyére shinŋi.
Cire yafyɛɛnre mɛɛni cèeŋkanni mɛɛni.
Kore jyaabii kàlaŋi mɛɛni là.
Tàange mɛɛni là.
2 Mii zòmbilinʼà sàa ɲî jwuntanmpe na.
Mii sí na mɛɛni cêe saanŋʼá.
Mii ɲjini na ɲyɛ mu à jwo sémesemewe niɲcɛnŋɛ sémeŋkyaan.
3 Mu lemʼà ɲwɔ Adamapyiibii puni na.
Tìpoompe na ɲyɛ mu jwumpe e.
Lire kurugo Kile à jwó lwɔ́ mu na tèrigii puni i.
4 Kàshikwɔnmpege,
maye cyîbi ná ma kàshikwɔnŋwɔɔni i.
Lire li ɲyɛ mu sìnnanmpe ná mu bwompe.
5 Jyè ná ma sìnampe e ma shwɔnge wòtoroŋi i,
ma a kàshige kwɔ̀n ma a mpyi javoo.
Shà kàshige kwɔ̀n sèeŋi ná maye ntìrigeŋi ná ntìiŋi kurugo.
Mu kàniŋɛ cyɛge ku ma pyi ma jà a kabwɔhii niɲyahigii pyi.
6 Mu tàanbii ɲwɔyʼà táan,
pi sí sùpyire cyán mu tooyi ɲwɔhʼi
si saanŋi zàmpɛɛnbii bò.
7 Kile,
mu saanre yatɛɛnŋke sí n-kwôro ku cyage e tèrigii puni i fo tèekwombaa.
Mu saanre kàbiini na ɲyɛ ntìiŋi kàbii.
8 Ntìiŋʼà táan mu á,
ka pege si mpɛn mu á.
Lire kurugo,
Kile,
mu Kileŋi à mu cwɔɔnrɔ.
U à funntange sìnmpe tɛ̀gʼa mu tìri mà tòro mu shɛ̀rɛfeebii puni na.
9 Miri ná alowɛsi ná kasi sìnmpe nùguntanga wumpʼà wu mu vàanɲyi na.
Yatinre tùnmpe na fwore mu saanre bage ntàsuuŋi ŋkyànhigii woge e,
si funntanga nɔ mu na.
10 Saanbii pworobii na ɲyɛ mu ɲyii cyeebilʼe.
Saancwoŋʼà tɛ̀ɛn mu kàniŋke na,
u à uye lemɛ ɲwɔ ná Ofiri sɛɛnŋi pùcyage yaleere e.
11 Na pworo,
niŋgyiini cyán ma a lógo na ɲwɔ na.
Funŋɔ wwɔ̀ ma shiŋi shiinbii ná ma tuŋi pyɛnge na.
12 Saanŋʼà ɲyii yige mu kurugo mu sìnampe kurugo,
uru u ɲyɛ mu kafooŋi,
niŋkure sín maa u pêe.
13 Tiri kànhe shiinbii,
sùpyire puni nàfufeebii sí raa ma yaayi kaan mu á,
bà pi kyaa si mpyi si ntáan mu á mɛ.
14 Saanŋi pworoŋʼà jyè saanre bage e ná u sìnanmpe nimbwompe e.
U vàanɲyʼà cîn ná sɛɛnŋi i.
15 Pi à sà u yyéeŋɛ ná u vàansinanaɲyi i saanŋi yyahe taan,
u pùcepyiɲɛɛbii pìi ɲyɛ u fye e.
Pire mú à sà yyére mu yyaha taan.
16 Pi à myahigii cêe ná funntangʼe
mà sà jyè saanŋi bage e.
17 Saanŋi,
mu jyaabii sí n-pa n-tɛ̀ɛn mu tiibii saanre tatɛɛnge e.
Mu sí pi tìŋɛ ɲùŋufente na kìni cyeyi puni i.
18 Mii sí mu mɛtanga yyere tùluyi puni shwɔhɔlʼe,
lire ká mpyi,
supyishiŋi puni sí raa mu kêre tèrigii puni i fo tèekwombaa.