Sémeŋi Shwɔnwuŋi
(Zaburu 42—72)
Kile u ɲyɛ u cyafooŋi sɔ̀nŋɔre tatahage
42
Mɛceŋkuruŋke yyaha yyére shinŋi.
Kore jyaabii kàlaŋi mɛɛni là.
2 Mii Kileŋi,
bà cèŋke maha yu dùge lwɔhe lage na mɛ,
amuni mii na ŋkwòore mu lage na.
3 Kileŋi lage ɲyɛ mii munaani na lwɔhɔ fiige.
Kileŋi ɲyii wuŋi lage ɲyɛ mii na.
Ɲaha tère e mii sí n-shà naye cyêe u na yɛ?
4 Mii ɲyilwɔhʼà pyi mii ɲjyìŋi pìlaga bâra canŋa na.
Ɲaha kurugo yɛ,
tèrigii puni i,
pi maha mii yíbili:
«Taa mu u Kileŋi ɲyɛ ke?»
5 Mii aha sɔ̂nŋɔ,
tèni i mii mpyi ná sùpyire e
fo mii mpyi a supyikurumbwɔhe funntangawuubii yyaha cû
wuu u Kile pèente myahigii cêe na ɲaare na wà Kileɲaarebage e ke,
li maha mii ya na zòŋi na.
Lirʼà pyi kataan kuru supyikuruŋkʼá.
6 Mii zòŋi,
ɲaha kʼà mu yatanɲyi bò yɛ?
Ɲaha na mu na ŋkyɛn yɛ?
Ma sɔ̀nŋɔre taha Kile na,
ɲaha na yɛ,
mii sí núru fwù kan u á,
uru u ɲyɛ mii shwofooŋi ná mii Kileŋi.
7 Mii Kileŋi,
mii yatanɲyʼà kwû mii na.
Lire kurugo,
mà mii yaha Zhurudɛn kìni ná Hɛrimɔ ɲaŋke ná Misehari ɲaŋke cyage e,
mii à sɔ̂nŋɔ mu na.
8 Lùbwɔhe kà maha kabɛrɛ yyere.
Yire maha fuuli na yîri maa tùnmpe pyi sèlʼe.
Mu maha yire lùfuɲjiriyi ná puru lufoompe pyi pʼà mii ɲùŋɔ jò.
9 Kafooŋi Kile maha u cɛ̀nmpe cyêe mii na canŋke e,
lire e,
numpilage e,
mii maha myahigii cêe,
maa u pêe,
maa na ticuumpe kanfooŋi Kile ɲáare.
10 Mii sí yi jwo na Kileŋi á,
na kafaagʼá:
«Ɲaha na mu à funŋɔ wwɔ̀ mii na yɛ?
Ɲaha na mu à mii yyetanhawuŋi yaha
mii i ɲaare na zàmpɛɛnbii yyefuge cye e yɛ?»
11 Mii punʼà kyɛɛgɛ
mii zàmpɛɛnbii fahante cye kurugo.
Pi maha mii yíbili tèrigii puni i:
«Taa mu Kileŋi ɲyɛ ke?»
12 Mii zòŋi,
ɲaha kʼà mu yatanɲyi bò yɛ?
Ɲaha na mu na ŋkyɛn yɛ?
Ma sɔ̀nŋɔre taha Kile na,
ɲaha na yɛ,
mii sí núru fwù kan u á,
uru u ɲyɛ mii shwofooŋi ná mii Kileŋi.