Yaŋi kileɲarage
41
Mɛceŋkuruŋke yyaha yyére shinŋi.
Dawuda mɛɛni là.
2 Shinŋi u à yákili yaha fòŋɔfooŋi na ke,
urufoo wuunʼà ɲwɔ.
Ŋgahaŋi ká nɔ urufoo na tèni ndemu i ke,
Kafooŋi Kile maha urufoo shwɔ.
3 Kafooŋi maha yaha urufoo na maa u munaani shwɔ,
maa yyeɲiŋke kan u á ɲìŋke na.
U ɲyɛ na ɲɛɛgʼa u yaha u zàmpɛɛnbii cye e mɛ.
4 Mà u yaha u yasinniŋke na yampe cye e,
Kafooŋi maha u tɛ̀gɛ.
U aha mpyi u ɲyɛ a cùuŋɔ mɛ,
Kafooŋi maha u cùuŋɔ.
5 Mii à jwo:
«Kafooŋi,
ɲwɔ na na,
ma a na cùuŋɔ,
ɲaha kurugo yɛ,
mii à kapii pyi mu na.»
6 Mii zàmpɛɛnbii na jwumpimpe yu mii na na:
«Ɲaha tère e u sí n-kwû si u mɛge pînniŋɛ yɛ?»
7 Pi wà ká mpa fworo mii na,
kàyituwɔgɔre u maha yu.
U maha jwumpimpe ŋwɔhɔ u zòŋi na,
u aha fworo,
u asi sà a puru yu.
8 Mii zàmpɛɛnbii puni na katulwɔhɔre yu piyʼá mii kurugo.
Kapii li ɲyɛ pi funŋʼi mii kàmpanŋke na.
9 Pi na ŋko:
«Yampimʼà cwo u na,
tasinnage e u ɲyɛ ke,
u saha sì n-yîri mɛ.»
10 Ali mii cevooŋi sèe wuŋi,
uru ŋgemu na mii mpyi a sàa dá ke,
mii ná uru ŋgemu u mpyi maha sìi na lyî siɲcyan ke,
uru mú na mii tùnni.
11 Ŋka Kafooŋi,
ɲwɔ na na,
ma a na yîrige,
bà mii si mpyi si na ŋkooŋi wwû pi na mɛ.
12 Mii zàmpɛɛnbii ká mpyi pi ɲyɛ a jà mii na mɛ,
lire e mii sí n-cè na mii kyalʼà táan mu á.
13 Mu sí n-yaha mii na mii ntìiŋi kurugo,
mu sí mii yaha maye taan tèrigii puni i.
14 Fwùŋi u kan Kafooŋi,
Izirayɛli u Kileŋi á fo tèekwombaa.
Amiina!
Amiina!