Kafooŋi Kile à u báarapyiŋi shwɔ
40
Mɛceŋkuruŋke yyaha yyére shinŋi.
Dawuda mɛɛni là.
2 Mii à na sɔ̀nŋɔre puni taha Kafooŋi Kile na maa u ɲyii cyán.
U à u niŋgyiini pɛrɛ maa mii tùbilini lógo.
3 U à mii dìrʼa yige kakyaare kacyewyicuguŋke e,
maa mii yige yɔ̀ɔge e.
U à mii tooyi yyéeŋɛ kafaaga ɲuŋʼi,
maa mii yyéeŋʼa ɲwɔ.
4 U à mɛɛ nivɔnnɔ le mii ɲwɔ i,
mà pyi wuu Kileŋi pêe pêe mɛɛ.
Shinɲyahara sí lire ɲya si fyá Kafooŋi na,
si dá u na.
5 Ŋgemu ká dá Kafooŋi na maa laaga tɔɔn yàmpeente karigii
ná kafinivinibii na ke,
urufoo wuunʼà ɲwɔ.
6 Kafooŋi mii Kileŋi,
kacɛɛnŋkii nimbwɔhigii ná kakyanhala karigii mu à pyi wuu á ke,
cyirʼà sàa ɲyaha.
Mu cyíin ɲyɛ a sìi mɛ.
Cyi à ɲyaha fo mii ɲyɛ a cyi pɛ̀rɛge cè si ɲjwo mɛ,
mii sì n-jà cyi jwo nɔ cyi tɛgɛni na mɛ.
7 Sárayi ná yakanɲyi ɲyɛ a táan mu á mɛ,
mu à yire jwo a le mii niŋgyiini i.
Sárayi nizogoyi ná kapegigii yàfaŋi sárayi,
mu ɲyɛ a kuru kà cya mii á mɛ.
8 Lire e mii à jwo:
«Mii nimpaŋi u ŋge,
mii kani lʼà sémɛ Kile Jwumpe sémɛŋi i.
9 Mii Kileŋi,
mu ɲyii wuuni mpyiŋi u maha mii funŋke táan,
mu Sàliyaŋi jwumpe mú sí ɲyɛ mii zòmbilini na.»
10 Mii à mu ntìiŋi kyaa jwo shinɲyahare nimbinnibii shwɔhɔlʼe.
Mii ɲyɛ a na ɲwɔge tò pu na mɛ,
Kafooŋi,
mu yábiliŋʼà yire cè.
11 Mii ɲyɛ a mu ntìiŋi ŋwɔhɔ na zòŋi na mɛ,
mii à mu ɲwɔmɛfente ná mu sùpyire zhwoŋi jáara.
Mii ɲyɛ a mu cɛ̀nmpe ná mu ɲwɔmɛfente ŋwɔhɔ shinɲyahare nimbinnibii na mɛ.
12 Kafooŋi,
mu sì ɲɛɛ mii kún ma ɲùɲaare na mɛ.
Mu cɛ̀nmpe ná mu ɲwɔmɛfente ti kwôro ná mii i tèrigii puni i.
13 Ɲaha kurugo yɛ,
ŋgaha niɲyahawa à mii kwûulo,
mii sì n-jà ŋgemu tɔ̀rɔ mɛ.
Mii karigii nintimbaagilʼà mii ɲùŋɔ jò
fo mà mii pyi mii saha ɲyɛ na ɲaa mɛ.
Cyi à ɲyaha mii ɲùɲjoore pɛ̀rɛge na.
Mii fànhe punʼà kwɔ̀.
14 Kafooŋi,
ɲwɔ na na,
ma a na ɲùŋɔ wwû.
Kafooŋi,
fyâlʼa pa na tɛ̀gɛ.
15 Mpii pi ɲyɛ na mii caa raa bùu ke,
pire pi sílige fo pi ɲùɲyi yi sôgo.
Mpiimu u funntanga ɲùŋɔ ku ɲyɛ mii wuuni li kɛ̀ɛgɛ ke,
pire pi síligʼa núru.
16 Mpii pi na ŋko:
«Ha ha haa!»
mii na ke,
silige ku pire fànhe kwɔ̀ feefee.
17 Ŋka mpii pi ɲyɛ na mu caa ke,
pire pi pyi funntanga nimbwɔhʼe mu kurugo.
Mpii pi ɲyɛ na cáa mu zhwoŋi na ke,
pire pi a ŋko tèrigii puni i:
«Kafooŋi à pêe.»
18 Mii na ɲyɛ fòŋɔfoo,
làbaafoo,
ŋka Kafooŋi à yaha mii na.
Mu u ɲyɛ mii tɛgɛfooŋi ná mii shwofooŋi,
mii Kileŋi,
ta fyâa ma a ma a pa na tɛ̀gɛ.