Sùpyaŋi shìŋi ɲyɛ yafyin mɛ
39
Mɛceŋkuruŋke yyaha yyére shinŋi Yedutun.
Dawuda mɛɛni là.
2 Mii mpyi a jwo:
«Mii sí raa naye kàanmucaa,
mii ɲwɔge kà ŋkwɔ̀ na le kapilʼe mɛ.
Mii sí n-cû na ɲwɔge na shinpiŋi ká mpyi mii taan tèni ndemu i ke.»
3 Mii à fyâha,
mii ɲyɛ a yafyin jwo mɛ.
Ali jwuɲcɛnmpe,
mii ɲyɛ a pu jwo mɛ.
Ŋka mii tayaŋke mpyi na nâre na wà.
4 Mii zòŋi mpyi na mii súuge.
Mii sɔ̀nŋɔrʼà pyi mu à jwo na,
mii funŋke e,
li ɲyɛ a pa ɲwɔ mɛ,
ka mii i jwumpe lwɔ́ ɲjwo:
5 «Kafooŋi Kile,
na canmpyaagii tɛgɛni cyêe na na,
mà bâra na shìŋi tɛgɛni na,
bà mii si mpyi si na shìŋi canmpyaagii mbereŋi cè mɛ.»
6 Ku ke,
mu à mii shìŋi tɔɔnre pyi kantaa tɔɔnrɔ fiige kanna.
Mii shiŋi canmpyaagii ɲyɛ yafyin mu yyahe taan mɛ.
Sèeŋi na,
sùpyaŋi ká mpyi pyiŋkanna o pyiŋkanna na ke,
u ɲyɛ yafyin kafɛɛgɛ kàntugo mɛ.
Shelaa
7 Sèeŋi na,
sùpyaŋi maha ntòro nàɲja fiige.
Tùnmpe u maha mpyi ke,
puru puni ɲyɛ kafɛɛgɛ.
U maha nàfuuŋi caa na bínini,
ŋka u ɲyɛ a cè shinŋi u sí n-pyi u foo mɛ.
8 Ɲyɛ,
Kafooŋi,
ɲaha shi na mii sí na sɔ̀nŋɔre taha yɛ?
Mii sɔ̀nŋɔre punʼà taha mu na.
9 Na shwɔ na ntìimbaaŋi puni na.
Ma hà funŋɔ bàa shiinbii yaha pi na sílige mɛ.
10 Mii sí n-fyâha,
mii saha sì yaaga jwo mɛ,
ɲaha kurugo yɛ,
mu u à mii pyi mii i ŋkyaali amɛ.
11 Na bwɔɔnre ɲwɔ yaha amuni
Ɲaha kurugo yɛ,
mu cyɛge bwɔɔnrʼà mii fànhe puni kwɔ̀.
12 Mu maha yyefuge nɔ sùpyaŋi na si u kíbe u katupwɔhɔyi kurugo.
Yaayi kani lʼà waha u na ke,
mu maha yire kɛ̀ɛgɛ mu à jwo yakwu u à jyè yaagʼe.
Sùpyaŋʼà sìi mu à jwo kafɛɛgɛ.
Shela
13 Kafooŋi,
na ɲaarege lógo,
ma a ma niŋgyiini cyán na yini na.
Ma hà ɲyiigii tò na ɲyilwɔhe na mɛ,
ɲaha kurugo yɛ,
mii na ɲyɛ nàmpɔnŋɔ fiige mu pyɛnge e.
Mii nintoroŋi wi na tulyɛyi fiige.
14 Ma yyahe wwû nʼi bà mii si mpyi si funntanga ta,
mà jwo mii i ŋkàrʼa yîri naha feefee ke.