Yyefugofoo kileɲarage
38
Dawuda mɛɛni là,
funɲcwugo mɛɛni.
2 Kafooŋi Kile,
mu lùyiri wuŋi kà yyefugo wà na na mɛ,
mu nàvunŋɔ wuŋi kà na kíbe mɛ.
3 Ɲaha kurugo yɛ,
mu tàanbilʼà mii sú,
ka mu cyɛge si mii cùu.
4 Mu lùyirinʼà mii cyeere puni pyi ti i mii ya,
mii kaciiyi puni na mii jyii mii kapegigii kurugo.
5 Ɲaha kurugo yɛ,
mii katupwɔhɔyʼà ɲyaha fo mà mii ɲùŋɔ jò.
Yʼà pyi mu à jwo tuguro,
ntemu tʼà dùgo mii na ke.
6 Mii nɔɔyʼà fwɔ́nhɔ fo na fìnimpe yige,
mà lire ɲùŋke pyi mii funŋɔbaare.
7 Mii à kànha,
mii fànhe punʼà kwɔ̀ fo mà mii tùbuŋi kûru.
Mii nàvunŋɔ wuŋi u maha ɲaare canŋa maha canŋa.
8 Mii sèrigii na mii súuge na fiige.
Tayambaaga saha ɲyɛ a sìi mii cyeere e mɛ.
9 Fànkwɔɔn saha ɲyɛ a sìi mii i mɛ,
tayyeregʼà fô mii na.
Mii na ŋkyɛ̀n zòŋi ɲjàŋi na.
10 Kafooŋi,
yaaga maha yaaga kyaa li ɲyɛ mii na ke,
mu à cè,
mii kyɛɛnni mú ɲyɛ a ŋwɔhɔ mu na mɛ.
11 Mii zòŋi na ŋkwòre fànha na,
mii fànhe si i ŋkwùu,
mii ɲyiigii bɛ̀ɛnmpe mú à kwɔ̀.
12 Mii yampʼà mii ceveebii ná mii shinceempii pyi pi saha ɲyɛ na filili mii na mɛ.
Mii pyɛngɛshiinbilʼà laaga tɔɔn mii na.
13 Mpii la ku ɲyɛ si mii bò ke,
pirʼà kànhaŋa cyán mii na,
mpii la ku ɲyɛ si mii wuuni kɛ̀ɛge ke,
mii bò bò jwumpe pire ɲyɛ na yu.
Canmpuni,
kapiini pi na bégeli mii mɛɛ na.
14 Ŋka mii na ɲyɛ ɲùɲcunnɔ fiige,
mii ɲyɛ na yafyin núru mɛ.
Maa mpyi mu à jwo búbu,
mii ɲyɛ na yu mɛ.
15 Mii à pyi mu à jwo shinŋi u ɲyɛ u ɲyɛ na núru mɛ,
u ɲwɔge sì jà a wà ɲwɔ shwɔ mɛ.
16 Kafooŋi,
mu na mii à na sɔ̀nŋɔre taha,
mu u sí mii ɲwɔ shwɔ Kafooŋi,
mii Kileŋi.
17 Mii à jwo:
«Ma hà pi yaha pi a ɲcyàhali na yyefuge na ɲyɛ mii na mɛ,
pi àha piye pêe na mii tɔɔgʼà pɔ́ɔgɔ mɛ.»
18 Ɲaha kurugo yɛ,
mii na ŋko raa ɲcwo,
mii tayaŋke saha si ɲyɛ mii na.
19 Mii à yyére na ntìimbaaŋi na,
mii kapegigilʼà mii funŋɔ pɛn.
20 Cyire mú i,
mii zàmpɛɛnbilʼà cùuŋɔ,
pi fànhe sʼà ɲyaha.
Mpii pi à mii kyaa pɛn piyʼá ɲùŋɔ bàa ke,
pirʼà ɲyaha.
21 Pi à mii kacɛnni fwooni tò mii na ná kapiini i,
pi à mii cɛ̂ɛgɛ ɲaha na yɛ,
mii na kacɛnŋii pyi.
22 Kafooŋi,
mʼàha cye wwû na taan mɛ,
mii Kileŋi,
mʼàha laaga tɔɔn na na mɛ.
23 Ta fyâa ma a ma,
ma pa na tɛ̀gɛ,
Kafooŋi,
mu u ɲyɛ mii shwofooŋi.