Shinpiŋi ná shincɛnŋi takwɔɔre
37
Dawuda mɛɛni là.
Mʼàha ma lùuni yîrige shinpiibii kurugo mɛ,
mʼàha ɲyii yige kakuumpyiibii kurugo mɛ,
2 ɲaha kurugo yɛ,
pi sí n-fàan fwɔfwɔ ɲyɛgɛ fiige,
si waha bà yapurugo maha waha mɛ.
3 Maye tíiŋɛ Kafooŋi Kile na,
ma a kacɛnŋii pyi.
Tɛ̀ɛn kìni i,
ma a ɲaare sèeŋi ɲuŋʼi.
4 Kafooŋi wwoɲɛɛge ku ma funŋke táan,
lire ká mpyi,
u sí mu zòmbilini ɲyii yaayi kan mu á.
5 Ma karigii puni le Kafooŋi cye e,
ma a ma sɔ̀nŋɔre taha u na,
u sí cyi cwɔɔnrɔ.
6 U sí mu ntìiŋi pyi u fworo mu à jwo bɛ̀ɛnmɛ,
si mu tànge pyi canŋaɲyiini fiige canvwuge na.
7 Tɛ̀ɛn tanuge e Kafooŋi taan,
ma a u ɲyii cyán.
Mpiimu u cyeleŋkarii na ɲwɔge ke,
pire yiɲcyɛge kà mpyi mʼi mɛ.
Mpii pi ɲyɛ ná funŋkyanɲyi i ke,
mʼàha lùuni yîrige pire taan mɛ.
8 Lùyiri karigii ɲwɔ yaha ma a láha lùpɛɛnni na.
Ma lùuni kà mpɛn mɛ,
lire baare e,
mu sí kapii pyi.
9 Mpiimu sí ká kapii pyi ke,
pire sí n-bò n-yige wani,
ŋka mpiimu ká pi sɔ̀nŋɔre taha Kafooŋi na ke,
pire sí kìni ta kɔɔgɔ.
10 Naha ná tère shwɔhɔlʼe,
shinpiŋi saha sì ɲya mɛ.
Mu aha u tatɛɛnge wíi,
mu sì u ɲya mɛ.
11 Ŋka mpii pi à piye tîrige ke,
pire sí kìni ta kɔɔgɔ.
Pire sí n-sìi n-pyi yyeɲiŋke e.
12 Shinpiŋi maha vùnŋɔ pwɔ shincɛnŋi na,
fo maha ŋkyànhigii kùru u kurugo.
13 Ŋka Kafooŋi maha shinpiŋi fwɔ́hɔrɔ,
ɲaha kurugo yɛ,
u à li cè na u kyaage canŋkʼà nɔ a kwɔ̀.
14 Shinpiibii na pi kàshikwɔnŋwɔɔni wwû,
maa pi sintaayi bégeli,
si ntɛ̀gɛ kanhamafeebii ná fòŋɔfeebii bò,
mpii pi na ɲaare kuni nintiini i ke,
si pire kɔɔngɔ.
15 Ŋka pi kàshikwɔnŋwɔhigii sí pi yabilimpii zòompii fûrugo.
Pi sintaayi sí n-kyɛɛgɛ.
16 Shintíiŋi cyeyaani nimbileenʼà pwɔ́rɔ
shinpiibii puni cyeyaayi niɲyahayi na.
17 Ɲaha kurugo yɛ,
shinpiibii fànhe sí n-kɛ̀ɛgɛ,
ŋka Kafooŋi sí shintíibii tɛ̀gɛ.
18 Kafooŋi maha yaha shintíibii na pi shìŋi canmpyaagilʼe,
kɔɔge u à kan pi á ke,
kuru sí n-kwôro fo tèekwombaa.
19 Pi sì n-sílige yyefuge canŋke mɛ,
pi sí n-tìn katibwɔhe tèni i.
20 Ŋka shinpiibii shi sí n-tò
Kafooŋi zànmpɛɛbii sí n-pînni bà yafyɛɛnre nisinnante maha mpînni mɛ.
Pi sí n-kwɔ̀ naŋgurugo fiige.
21 Shinpiŋi ká yaaga tàanna,
u ɲyɛ na ku cyaga núruŋi mɛ.
Ŋka shintíiŋi maha ɲùɲaara taa maa ŋkaan sèlʼe.
22 Kile ká jwó lwɔ́ mpimu na ke,
pire sí kìni ta kɔɔgɔ.
Ŋka u aha mpimu láŋa ke,
pire sí n-bò n-yige wani.
23 Shin toroŋkanni ká Kafooŋi táan,
u maha urufoo tooyi tacyanɲyi ɲwɔge u á.
24 Urufoo mɛɛ ká búrugo,
u sì n-cwo mɛ.
Ɲaha kurugo yɛ,
urufoo cyɛge maha mpyi Kafooŋi cye e.
25 Mii mpyi nàŋkocaawa,
mii à lyɛ numɛ.
Ŋka mii sàha ntêlʼa cye ɲya kʼà wwû shintíiŋi taan,
lire ɲyɛ mɛ,
mà u tùluge shiinbii ɲya pi i ɲáare na lyî mɛ.
26 U ɲùŋke maha mpi tèrigii puni i,
u maha fwɔ̀higii leni sùpyire na.
U tùluge shiinbii puni wuuni maha ɲwɔ.
27 Láha kapiini na,
maa kacɛnni pyi,
lire ká mpyi,
mu sanɲcwɔnŋi sí n-kɔ̀rɔ ɲwɔ tèrigii puni i.
28 Ɲaha kurugo yɛ,
ntìiŋʼà táan Kafooŋi á.
Mpii pi ɲyɛ na fyáge u na ke,
u sì cye wwû pire taan mɛ.
U maha yaha pire na tèrigii puni i.
Ŋka shinpiibii tùluge sí n-bò n-yige wani.
29 Shintíibii sí kìni ta kɔɔgɔ.
Pi sí n-tɛ̀ɛn lʼe fo tèekwombaa.
30 Yákilifente jwumpe maha fwore shintíiŋi ɲwɔge e,
u ɲjini maha ntìiŋi karigii yu.
31 U Kileŋi Sàliyaŋi maha mpyi u zòŋi na,
u tɔɔge sì n-sìi n-pɔ́ɔgɔ mɛ.
32 Shinpiŋi maha shintíiŋi peeli,
u maha u boŋkanna caa.
33 Ŋka Kafooŋi sì ɲɛɛ u le u cye e mɛ,
pi aha ŋkàre ná u e yukyaabii yyére,
Kafooŋi sì jwumpe yaha pu cwo u na mɛ.
34 Ma sɔ̀nŋɔre taha Kafooŋi na,
ma a u kurigii ɲaare.
Lire ká mpyi u sí mu dùrugo si kìni kan mu á kɔɔgɔ.
Shinpiibii shi sí n-bò n-yige wani.
35 Mii à shinpiŋi ɲya u kyanmpe e,
u u mpìli na fwore,
mu à jwo wempuruyo cibwɔhɔ.
36 Ŋka u à tòro,
u sàha ɲyɛ mɛ.
Mii à u cya shiŋi puni,
ŋka mii ɲyɛ a u ɲya mɛ.
37 Zòvyinre foo kàanmucya maa shincɛnŋi wíi,
ɲaha kurugo yɛ,
shinŋi u ɲyɛ na yyeɲiŋke caa sùpyire ná tiye shwɔhɔlʼe ke,
uru nùmpanŋkʼà ɲwɔ.
38 Ŋka mpii pi à ɲùŋɔ kyán ke,
pire shi sí n-tò.
Shinpiibii takwɔɔre ɲyɛ kakyara.
39 Shintíibii zhwoŋʼà fworo Kafooŋi i,
uru u ɲyɛ pi sanɲcwɔnsigiŋi yyefuge tèni i.
40 Kafooŋi sí pi tɛ̀gɛ si pi shwɔ.
U sí pi yige shinpiibii cye e si pi shwɔ.
Ɲaha kurugo yɛ,
pi à piye tíiŋɛ u na.