Shinpiŋi kapyiiŋkii ná Kile cɛ̀nmpe kani
36
Mɛceŋkuruŋke yyaha yyére shinŋi.
Kafooŋi Kile báarapyiŋi Dawuda mɛɛni là.
2 Shinpiŋi ɲùŋkyanjwumpe maha li cyêe mii na,
na u ɲyɛ a sìi na fyàge Kile na mɛ.
3 U maha ŋkwɔ́hɔli uye na,
fo maha li yaha na uru kapiini sì ɲya mɛ,
u mú sì kàntugo wà li na mɛ.
4 U ɲwɔjwumpe puni na ɲyɛ ntìimbaa ná nàɲwɔhɔrɔ.
U ɲyɛ na ɲɛɛge yákilifente na sʼa kacɛnŋii pyi mɛ.
5 Mà u niziniŋi yaha u yasinniŋke na numpilage e,
kapiini u maha sɔ̂nŋi.
Kuntiimbaani u maha lwɔ́,
u ɲyɛ na ɲcyíge kapiini na mɛ.
6 Kafooŋi,
mu cɛ̀nmpe maha nɔ fo nìɲyiŋi i.
Mu ɲwɔmɛfente maha dùgʼa nɔ fo ɲahayi na.
7 Mu ntìiŋi na ɲyɛ mu à jwo ɲaɲyi puni nintɔɔnge.
Mu yukyaanʼà cûgo suumpe lwɔhe fiige.
Kafooŋi,
mu maha sùpyire ná yatɔɔre tɛ̀gɛ.
8 Kile,
mu cɛ̀nnmpʼà pwɔ́rɔ yaayi puni na.
Sùpyire maha ŋwɔhɔni mu fukange mbyimpe e.
9 Mu maha pi pyi pi à tìn mu bage funŋɔ yaayi niɲcɛnɲyi i.
Mu maha pi pyi pi i byii mu cɛ̀nmpe baŋi lwɔhe e.
10 Ɲaha kurugo yɛ,
mu á shìŋi lùbiliŋi ɲyɛ.
Mu bɛ̀ɛnmpe cye kurugo,
wuu maha bɛ̀ɛnmpe ɲaa.
11 Mpii pi à mu cè ke,
ta cɛ̀nmpe pyi pire na tèrigii puni i,
Mpiimu u zòmii pi à ɲwɔ ke,
yaha pire na ma tàanna ná ma ntìiŋi i.
12 Ma hà yàampeente feebii yaha pi na kɔ̀rʼa ta mɛ,
shinpiibii cyeyi kà nɔ na na mɛ.
13 Kakuumpyiibii cwuŋkanni wíi!
Pi à cwo ali pi saha sì n-jà n-yîri mɛ.