Kileɲarage yyefuge tèni i
35
Dawuda mɛɛni là.
Kafooŋi Kile,
na cɛ̀ɛgɛfeebii cɛ̂ɛgɛ.
Na tunveebii tùn.
2 Tɔɔnnte yabeŋke nimbileni ná nimbwɔhe lwɔ́,
maa yîrʼa na tɛ̀gɛ.
3 Ma tàanŋi ná sìɲcyanhe lwɔ́ na kɔrɔfeebii mɛɛ na.
Na yaha si yi lógo ma ɲwɔ na,
na mu u ɲyɛ mii shwofooŋi.
4 Mpii pi ɲyɛ na mii caa raa bùu ke,
silige ná ɲjirivahante ti nɔ pire na.
Mpii pi ɲyɛ na mii wuuni caa si ŋkɛ̀ɛge ke,
pire ɲùzogo wuubii pi núru.
5 Pi pyi mu à jwo sùmwɔhɔŋɔ,
kafɛɛge na ŋkɛ̀ɛge ná ŋkemu i ke.
Kafooŋi mɛ̀lɛkɛŋi u pi ɲwɔhɔ lwɔ́.
6 Pi kuni li pyi numpire li raa ntɛ̀rɛni.
Kafooŋi mɛ̀lɛkɛŋi u pi ɲwɔhɔ fâara.
7 Ɲaha kurugo yɛ,
pi à kànhayi pɛrɛ mii yyaha na ɲùŋɔ bàa,
maa kacyewyiyi kwɔ̀n mii mbòŋi kurugo ɲùŋɔ bàa.
8 Kakyaare ti pâlʼa pi ta mà pi ta pi ɲyɛ a tɛ̀ɛn ná lʼe mɛ.
Pi cû pi yabilimpii kànhayi nimpɛrɛyi na,
Pi cû yi na fo yi pi kakyara.
9 Lire ká mpyi,
mii sí n-pyi funntange e Kafooŋi cye kurugo,
sʼa múguri u mii zhwoŋi kurugo.
10 Mii sí n-jwo ná na zòmbilini puni i:
«Kafooŋi,
mu ɲcaŋi u à sìi jofoo yɛ?
Mu u maha cwɔ̀nrɔmɔfeebii shwuu pi kyéregefeebii fànhaɲyahaga wuubii na,
maa kanhamafeebii ná fɔ̀ŋɔfeebii shwuu pi kyɛɛgɛfeebii na.»
11 Kafinivinibii pìlʼà yîri mii kurugo,
maa mii cɛ̂ɛgɛ tawage e.
12 Pi à mii kacɛnni fwooni tò ná kapiini i,
mii à kwôro naye niŋkin.
13 Mà li ta,
tèni i pi mpyi na ya ke,
mii à kwùge vàanɲyi le,
maa naye tîrige maa sunŋi le,
maa ŋkwôro na Kile ɲáare.
14 Mii mpyi maha ɲaare lùtaan na,
mu à jwo mii cevoo lire ɲyɛ mɛ,
mii pyɛngɛ shin u à kwû.
Mii mpyi maha bûru maa mɛɛ sú
mu à jwo wà u ɲyɛ na u nu yamɛɛ súu.
15 Ŋka yyefuge ká mpyi mii na,
pi maha piye bínni maa múguro.
Pire shinpiibii maha piye bínni mii kurugo mii pàama,
maa mii kyérege tèrigii puni i.
16 Pi maha mii fwɔ́hɔre
fo maha pi ŋkyànhigii kùru mii kurugo.
17 Kafooŋi,
mu sí ɲcyii karigii kwú maye e zà nɔ fo ɲaha tère na yɛ?
Na munaani shwɔ pi kawaagii na,
na shwɔ yire cànrayi na.
18 Lire ká mpyi,
mii sí mu kêe supyikurumbwɔhe shwɔhɔlʼe.
Mii sí fwù kan mu á shinɲyahara shwɔhɔlʼe.
19 Mii zàmpɛɛnbii pi ɲyɛ na fini mii na tawage e ke,
ma hà pi yaha pi múguro ná mii kani i mɛ.
Mpii pi à mii kyaa pɛn piyʼá tawagʼe ke,
ma hà pire yaha pi a pi ɲyiigii kwòre na na mɛ.
20 Ɲaha kurugo yɛ,
pi ɲyɛ a sìi na yyeɲiŋke jwumpe yu pi ɲwɔyʼi mɛ,
sùpyire ti ɲyɛ ti ɲyɛ na nɔni wà na kìni i mɛ,
pire na pi maha vùnmpwɔɔre pyi.
21 Pi maha pi ɲwɔyi puni múgo mii mɛɛ na maa jwo:
«Anhaan,
wuu yabilimpii ɲyiigilʼà ɲya!»
22 Kafooŋi,
mu ɲyii ɲya pi na,
ma hà li táan pi na mɛ.
Kafooŋi,
ma hà laaga tɔɔn na na mɛ.
23 Mii Kileŋi ná mii Kafooŋi,
ɲɛ̀ a yîri maa na tànga kan,
na tùbilini kɔ̀rɔ.
24 Kafooŋi,
mii Kileŋi,
na sâra ma tàanna ná ma ntìiŋi i.
Ma hà pi yaha pi múguro ná mii kani i mɛ.
25 Pi àha n-jwo:
«Cɔ!
Nde wuu mpyi na ɲcaa ke,
wuu à lire ta» mɛ.
Ma hà pi yaha pi jwo:
«Cɔ,
wuu à u pínniŋɛ» mɛ.
26 Mii kayani funntange ɲyɛ mpimu i ke,
pire puni pi sílige fo si pi ɲùɲyi sôgo.
Mpii pi ɲyɛ na piye pêre mii na ke,
silige ná fanhante ti pire tò.
27 Ŋka mpii la ku ɲyɛ si li ɲya na mii tànga ki ke,
pire pi a ŋkúuli funntange cye e.
Pire pi a ŋko tayahaga bàa:
«Pèente ti taha Kafooŋi na,
u báarapyiŋi u pyi yyeɲiŋke e,
lirʼà táan u á!»
28 Lire ká mpyi,
mii ɲwɔge sí raa mu ntìiŋi kyaa yu
sʼa mu kêre canŋa maha canŋa.