Kile maha u wuubii ɲarayi shwuu
34
Dawuda mɛɛni là.
Dawuda à nde mɛɛni cêe tèni i u à uye pyi sìcyerefoo Abimelɛki ɲyii na ka u u u kɔ̀rɔ ke.
2 Mii sí raa fwù kaan Kafooŋi Kile á tère maha tère.
Mii ɲwɔge sí raa u pèente myahigii cêe tèrigii puni i.
3 Kafooŋi u ɲyɛ mii naye ndùrugoŋi ɲùŋke.
Mpii pi à piye tîrige ke,
pire pi yire lógo pi i mpyi funntange e.
4 Yii bâra na na,
wuu u Kafooŋi kêe siɲcyan.
Wuu u mɛge pêe siɲcyan.
5 Mii à Kafooŋi yyere,
ka u u mii ɲwɔ shwɔ,
maa mii fyagara karigii puni láha mii na.
6 Mpii pi ɲyɛ na Kafooŋi wíi ke,
pire yyahayi maha ɲî funntange na.
Pire sì n-sílige mɛ.
7 Kanhamafooŋʼà mɛɛ wà Kafooŋi á,
ka u u u ɲwɔ shwɔ,
maa u shwɔ u cwɔ̀nrɔmɔ karigii puni na.
8 Kafooŋi mɛ̀lɛkɛŋi maha Kile yyahafyagarefeebii kwûulo,
maa pi sanɲcwɔnŋi sigili,
maa pi shwuu.
9 Yii Kafooŋi shi wíi,
yii sí n-cè na u à ɲwɔ.
Mpii pi à piye tíiŋɛ u na ke,
pire wuunʼà ɲwɔ.
10 Yii pi ɲyɛ Kafooŋi wuubii ke,
yii a fyáge u na,
ɲaha kurugo yɛ,
mpii pi ɲyɛ na fyáge u na ke,
yaaga kuu sì pire ta mɛ.
11 Yaayi kuuŋi ná katege maha cànralyevɔnɲyi taa,
ŋka mpii pi ɲyɛ na Kafooŋi caa ke,
yacɛnŋɛ kuu sì pire ta mɛ.
12 Yii a ma,
mii pyìibii yii i mpa lógo na ɲwɔ na,
mii sí yii taanna Kafooŋi yyahafyagare na.
13 Jofoo la ku ɲyɛ u shìŋi si ntáan u na yɛ?
Jofoo la ku ɲyɛ u shìŋi canmpyaagii cyi ɲyaha yɛ?
14 Urufoo u a u ɲjini kàanmucaa jwumpimpe ɲjwuŋi na,
u raa u ɲwɔseeyi kàanmucaa nàɲwɔhɔre jwumpe na.
15 Láha kapegigii na,
maa kacɛɛnŋkii pyi,
maa yyeɲiŋke caa,
maa ntaha kuru fyè e.
16 Kafooŋi maha ɲyiini cyán shintíibii na,
u maha u niŋgyiini pɛrɛ pi tùbilini na.
17 Ŋka Kafooŋi maha ntùŋke taha kapiimpyiibii na,
maa pi shi tò fo maha sùpyire funŋɔ wwɔ̀ pi na ɲìŋke na.
18 Shintíibii ká tùbili wà Kafooŋi á,
u maha li lógo,
maa pi shwɔ pi cwɔ̀nrɔmɔ karigii puni na.
19 Kafooŋi na ɲyɛ cwɔ̀nrɔmɔfeebii ŋkère na,
mpiimu u zòmpyaa cyi na pi cɛ̂ɛge ke,
u maha pire shwɔ.
20 Kawagii niɲyahigii maha shintíiŋi leni,
ŋka Kafooŋi maha u shwuu cyire puni na.
21 U maha yaha u kaciiyi puni na,
ku kà ka ŋkwɔ̀ ŋkebe mɛ.
22 Pege sí shinpiŋi bò,
tìgire sí ɲcyán shintíiŋi tùnvooŋi na.
23 Kafooŋi sí u báarapyiibii ɲùŋɔ wwû,
mpii pi à piye tíiŋɛ u na ke,
tìgire sì n-cyán pire wà na mɛ.