Myahigii cyi cêe dávooŋi ná shwofooŋi Kile á
33
Yii pi à tíi ke,
Kafooŋi Kile kani li yii pyi yii a ŋkwúuli funntange cye e,
ɲaha kurugo yɛ,
u ŋkèeŋʼà yaa u a fwore shincɛɛnmpii ɲwɔyi i.
2 Yii Kafooŋi kêe ná mpòoŋke e,
yii i u pèente myahigii cêe ná mepyaa kɛ ŋkɔ̀nnɔŋi i.
3 Yii mɛɛ nivɔnnɔ cêe u á.
Yii u kêe ná yii yatire ná myahigilʼe.
4 Ɲaha kurgo yɛ,
Kafooŋi jwumpe ɲyɛ sèe,
u mú maha u karigii puni pyi ɲwɔmɛfente funŋke e.
5 Ntìiŋi ná sèeŋʼà táan u á.
Ɲìŋkʼà ɲî Kafooŋi cɛ̀nmpe na.
6 Kafooŋi jwumpe cye kurugo nìɲyiŋʼà dá,
nìɲyiŋi wwɔrigii punʼà dá u ɲwɔkafɛɛge cye kurugo.
7 U maha suumpe lwɔhe puni bínni cyaga niŋkin i.
U maha lùbwoyi leni tacuguyi i.
8 Ɲìŋke ɲuŋɔ yaayi punʼà yaa yʼa fyáge Kafooŋi na.
Diɲyɛŋi sùpyire punʼà yaa pi a ɲcyɛ̂ɛnni u yyaha na.
9 Ɲaha kurugo yɛ,
u aha ndemu jwo ke,
lire maha mpyi
u aha jwo ndemu li pyi ke,
lire maha mpyi.
10 Kafooŋi maha supyishiŋi funŋɔ kani fwɔ́nhɔ u funŋʼi,
maa sùpyire funzɔnŋɔre pyi tʼà pyi laaga bàa.
11 Ŋka Kafooŋi funŋɔ kani ɲyɛ a sìi na ŋkɛ̀ɛge mɛ,
u aha ndemu lwɔ́ u zòmbilini na ke,
lire ɲyɛ a sìi na yîri mɛ.
12 Kafooŋi ká mpyi supyishiŋi ŋgemu u Kile ke,
pire wuunʼà ɲwɔ.
U aha mpiimu cwɔɔnrɔ mà pyi u wuu ke,
pire wuunʼà ɲwɔ.
13 Kafooŋi maha ntɛ̀ɛn nìɲyiŋi i maa ɲìŋke wíi.
U ɲyii ɲya sùpyire puni na.
14 U maha ntɛ̀ɛn u tatɛɛnge e,
maa ɲìŋke ɲuŋɔ sùpyire puni wíi.
15 Uru u à sùpyire puni zòompii yaa,
u maha pi kapyiiŋkii puni kàanmucaa.
16 Saanŋi ɲyɛ na shwuu kwùŋi na u kàshikwɔɔnbii ɲyahaŋi kurugo mɛ.
Kàshikwɔnmpege ɲyɛ na shwuu ku fànhe ɲyahaŋi kurugo mɛ.
17 Shwɔnge ɲyɛ na wà shwuu kàshige cyage e mɛ,
ku sì n-jà wà shwɔ ku fànhe ɲyahaŋi kurugo mɛ.
18 Ŋka Kafooŋi u maha yaha u yyahafyagarefeebii puni na,
mpii pi à pi sɔ̀nŋɔre taha u cɛ̀nmpe na ke,
u maha yaha pire na.
19 U maha pire munahigii shwɔ kwùŋi na,
maa pi ɲwɔ caa katege tèni i.
20 Wuu à wuye tíiŋɛ Kafooŋi na,
uru u ɲyɛ wuu tɛgɛfooŋi ná wuu tɔɔnnte yabeŋke.
21 Wuu zòmpyaagii maha mpyi funntange e uru kurugo,
ɲaha kurugo yɛ,
wuu à dá u mɛge niɲcɛnŋke na.
22 Kafooŋi,
ɲùɲaara ta wuu na,
ɲaha kurugo yɛ,
wuu à wuu sɔ̀nŋɔre taha mu na.