Kapegigii yàfaŋi ntaŋi funntange
32
Dawuda kàlaŋi wà.
Ŋgemu u sàliyaŋi kafuunŋkii ká yàfa u na,
ka ŋgemu u ŋgurugo si yaha a cyán ke,
urufoo wuunʼà ɲwɔ.
2 Kafooŋi Kile ɲyɛ a ŋgemu u ntìimbaa lwɔ́ a wíi mɛ,
ná nàɲwɔhɔrɔ funŋɔ ɲyɛ a sìi ŋgemu á mɛ,
urufoo wuunʼà ɲwɔ.
3 Mà mii ɲwɔge yaha kʼà tò mii kapegigii ɲjwuŋi na,
mii kaciiyi na mii jyii.
Mii à canmpuni pyi kyɛɛnni na.
4 Ɲaha kurugo yɛ,
pìlaga bâra canŋa na,
u cyɛgʼà mii fɛnrɛ.
Lire mpyi a mii fànhe kwɔ̀ mu à jwo canŋa kʼà cige waha.
Shelaa
5 Mii à na kapegigii jwo mu á,
mii ɲyɛ a na ntìimbaaŋi ŋwɔhɔ mu na mɛ.
Mii à jwo:
«Mii sí n-yyére li na Kafooŋi á na mii à kapegii pyi.»
Lire e,
mu à mii kapegigii yàfa mii na.
Shela
6 Lire kurugo,
mu yyahafyagarefeebii punʼà yaa pi a mu ɲáare ma tèeɲaralʼe.
Lire ká mpyi,
ali lùbwooni ká mpa,
li sì nɔ pi na mɛ.
7 Mu u ɲyɛ mii taŋwɔhɔge,
na shwɔ yyefuge na.
Mu à mii kwûulo ná zhwoŋi ŋgemu i ke,
mii sí funntanga myahigii cêe uru kurugo.
Shela
8 Kafooŋi à jwo:
«Mii sí yákilifente kan mu á.
Kuni i mu à yaa ma a ɲaare ke,
mii sí lire cyêe mu na.
Mii sí mu yɛrɛ,
si yaha mu na.
9 Mʼàha mpyi yákili bàa mu à jwo shɔngɔ lire ɲyɛ mɛ dùfaanŋa mɛ.
Mɛɛre ná kàrifeŋi maha le yire ɲwɔyi na,
bà yi si mpyi si ŋkúu mɛ.»
10 Yyefuyo niɲyahaya na ɲyɛ shinpiŋi yyaha na.
Ŋka ŋgemu ká dá Kafooŋi na ke,
u cɛ̀nmpe sí urufoo kwûulo.
11 Yii pi à tíi ke,
yii pyi funntange e Kafooŋi wwoɲɛɛge e.
Yii mpiimu u zòmii pi à ɲwɔ ke,
yii puni,
yii a ŋkúuli funntange cye e.