Kafooŋi Kile u ɲyɛ mii sùlufooŋi
31
Mɛceŋkuruŋke yyaha yyére shinŋi mɛɛni.
Dawuda mɛɛni là.
2 Kafooŋi Kile,
mii à naye tíiŋɛ mu na,
mʼàha sìi na yaha si n-sílige mɛ.
Na shwɔ ma ntìiŋi kurugo.
3 Ma niŋgyiini cyán na yini na,
ma a mpa na shwɔ fwɔfwɔ.
Pyi mii taŋwɔhɔge kafaage
ná mii kàshisulubage mii zhwoŋi mɛɛ na.
4 Ɲaha kurugo yɛ,
mu u ɲyɛ mii kafaage
ná mii kàshisulubage.
Tòro na yyaha na,
ma a na yyaha cû ma mɛge kurugo.
5 Kànhaŋke pi à cyán mii yyaha na ke,
mu sí mii shwɔ ku na,
ɲaha kurugo yɛ,
mu u ɲyɛ na mpàa mii na.
6 Mii à na munaani yaha mu cye e.
Mu à mii ɲùŋɔ wwû,
sèeŋifooŋi,
Kafooŋi Kile.
7 Mpii pi ɲyɛ na kacyanhigii sunni kaɲwɔɔ si ɲyɛ cyi na mɛ,
pire kyalʼà sàa pɛn mii á.
Mii à naye tíiŋɛ Kafooŋi na.
8 Mii sí n-pyi funntange ná múguriŋi i
mu cɛ̀nmpe kurugo,
ɲaha kurugo yɛ,
mu à mii yyefuge ɲya,
maa mii cwɔ̀nrɔmɔ karigii cè.
9 Mu ɲyɛ a mii yaha na zàmpɛɛnbii cye e mɛ,
maa mii yaha tacɛnŋi i.
10 Ɲùɲaara ta na na,
Kafooŋi,
ɲaha kurugo yɛ,
yyefuge na ɲyɛ mii na.
Nàvunŋkʼà mii yyahe wwɔ̀ mii na,
ka funmpɛɛnre si mii munaani na mii cyeere fànhe kwɔ̀.
11 Mii shìŋi punʼà pyi nàvunŋɔ.
Mii yyeegii punʼà pyi mii á kyɛɛnlɛ.
Mii fànhe punʼà kwɔ̀ mii ntìimbaaŋi kurugo.
12 Mii à pyi katanra yaaga na zàmpɛɛnbii punʼá.
Mii à sílige na tɛnɲɛɛbilʼá.
Mii à pyi fyagara yaaga na ceveebilʼá,
pi aha mii ɲya pyɛnkuuŋi i,
pi maha fî mii yyaha na.
13 Pi funŋʼà wwɔ̀ mii na,
bà pi funŋɔ maha wwɔ̀ shinkwuŋkwoŋi na mɛ.
Mii à pyi mu à jwo cwojyaga.
14 Jwoore pi na mpyi mii na ke,
mii à ti lógo.
Fyagare na ɲyɛ mii na kàmpanɲi puni na.
Pi à vùnŋɔ pwɔ mii na,
maa toŋi le mii mbòŋi mɛɛ na.
15 Ŋka mii à na sɔ̀nŋɔre taha mu na,
Kafooŋi.
Mii à jwo:
«Mu u ɲyɛ mii Kileŋi.»
16 Mii kataanmpe puni ɲyɛ mu cye e.
Na shwɔ na zàmpɛɛnbii
ná na kyérege feebii na.
17 Mii u ɲyɛ mu bilinaŋi ke,
ma yyetange cyêe na na,
ma a na shwɔ ma cɛ̀nmpe kurugo.
18 Kafooŋi mʼàha na yaha si n-sílege mɛ,
ɲaha kurugo yɛ,
mu mii ɲyɛ na ɲáare.
Shinpiibii yaha pi sílige,
pi yaha pi tîge fanŋke e,
pi àha yà tajwugo ta mɛ.
19 Ɲwɔɲyi i pi ɲyɛ na finni ke,
yi tò.
Yire e pi maha jwuɲjwumbaampe yu shintíibii na.
Yʼà ɲî yàampeente ná fahante jwumpe na.
20 Kafooŋi,
cɛ̀nmpe mu à yaha ma yyahafyagare feebii yyaha na ke,
purʼà ɲyaha dɛ!
Mpii pi à piye tíiŋɛ mu na ke,
mu maha puru cɛ̀nmpe pyi pirʼá sùpyire ɲyii na.
21 Mu maha pi ŋwɔhɔ maye taan,
maa pi laaga tɔɔn pi kyéregefeebii na.
Mu maha pi ŋwɔhɔ ma bage e,
ɲjìrigii nimpegigii yyaha na.
22 Kafooŋi u kêe,
ɲaha kurugo yɛ,
u à u cɛ̀nmpe kakyanhala wumpe cyêe mii na,
mà mii yaha mu à jwo kànha,
ŋkemu kàshicyɛgʼà kwûulo ke.
23 Mà mii yákiliŋi yaha u à wùrugo,
mii à jwo:
«Mu à mii kɔ̀rʼa lwɔ́ ma yyahe taan.»
Ŋka mii à mɛɛ wà mu á ke,
mu à mii ɲarage shwɔ.
24 Kafooŋi yyahafyagarefeebii puni,
yii u kyaa táan yiyʼá.
Kafooŋi maha yaha dánafeebii na,
ŋka u maha yyefugo niɲyahaga nɔ yàmpeentefeebii na.
25 Yii mpii puni pi à yii sɔ̀nŋɔre taha Kafooŋi na ke,
yii yiye ndíri,
yii i yii zòompii tàra.