Kafooŋi Kile u ɲyɛ ticuumpe kanfooŋi
30
Mɛɛni lʼà cêe mà tɛ̀gʼa Kileɲaarebage le Kile cye e ke.
Dawuda mɛɛni là.
2 Kafooŋi Kile,
mii à mu kêe ɲaha kurugo yɛ,
mu à mii yîrige.
Mu ɲyɛ a ɲɛɛ mii zàmpɛɛnbii pi cyàha mii na mɛ.
3 Kafooŋi,
mii Kileŋi,
mii à mu yyere ma na tɛgɛ,
ka mu u mii cùuŋɔ.
4 Kafooŋi,
mu à mii munaani shwɔ kwùŋi na,
mpii pi maha le fanŋke e ke,
mu à mii wwû pire shwɔhɔlʼe.
5 Yii pi ɲyɛ na fyáge Kafooŋi na ke,
yii u kêe ná myahigilʼe,
yii u pêe yii i u fyìnmpe kyaa jwo.
6 Ɲaha kurugo yɛ,
u lùyirini ɲyɛ na mɔni mɛ,
ŋka u cɛ̀nmpe sí n-kwôro fo tèekwombaa.
Yàkoŋke ká mpyi mɛsuu,
ɲyɛ̀ge sí n-pyi funntanga.
7 Mà mii yyeɲiŋɛ wuŋi yaha,
mii à jwo:
«Yafyin sì n-jà mii cúnŋɔ mɛ!»
8 Kafooŋi,
mu mpyi a ɲwɔ mii na ke,
mu mpyi a fànhe le mii tatɛɛnge ɲaŋke e.
Ŋka mu à ma yyahe ŋwɔhɔ mii na ke,
ka mii yákiliŋi si wùrugo.
9 Kafooŋi,
mii à mɛɛ wà mu á.
Mii à sàa mu ɲáare mii Kafooŋi.
10 Mii buwuŋi sí n-jà ɲaha ɲwɔ mu na yɛ?
Mii aha le fanŋke e,
tɔ̀ɔnŋi ŋgire mu sí n-ta lire e yɛ?
Shinŋi u ɲyɛ pworo kanna ke,
uru sí n-jà mu kêe la?
Uru sí n-jà mu ɲwɔmɛfente jáara la?
11 Lógo na ɲwɔ na Kafooŋi,
maa ɲùɲaara ta na na.
Kafooŋi,
na tɛ̀gɛ.
12 Mu à mii nàvunŋke kɛ̂ɛnŋʼa pyi funntanga
Mu à mii kwùge vàanɲyi wwû mii na,
maa kataanni vàanɲyi le mii na.
13 Lire e ke,
mii sí n-kwôro raa myahigii cêe sʼa mu kêre ná na zòmbilini puni i.
Kafooŋi mii Kileŋi,
mii sí raa mu kêre tèrigii puni i.