Kafooŋi Kile mɛjwuuni
29
Dawuda mɛɛni là.
Yii,
Kile mɛ̀lɛkɛɛbii,
yii pèenɛ taha Kafooŋi Kile na.
Yii u sìnanmpe ná u fànhe cêe mɛɛ.
2 Yii pèenɛ taha Kafooŋi mɛge nisinanŋke na.
Yii yaleere fyìnmpe woore le yiye na,
yii i niŋkure sín Kafooŋi taan.
3 Kafooŋi mɛjwuuni na fworo lwɔhe nìɲyii na.
Sìnampe foo Kile mɛjwuuni na ɲyɛ mu à jwo kiletinnɛ.
Kafooŋi na ɲyɛ lùbwɔhe ɲuŋɔ na.
4 Sífente na ɲyɛ Kafooŋi mɛjwuuni i,
Kafooŋi mɛjwuunʼà sàa táan.
5 Kafooŋi mɛjwuuni maha sɛdiri cibwoyi kyɛɛgɛ.
Kafooŋi maha Liban kìni sɛdiri ciye kyɛɛgɛ kyɛɛgɛ.
6 U maha Liban kìni ɲaɲyi pyi yi i yini mu à jwo nunaga.
Maa Hɛrɛmɔ ɲaŋke pyi ku u yini mu à jwo sige nunaga.
7 Kafooŋi mɛjwuuni maha nasimɔɔmpii yige.
8 Kafooŋi mɛjwuuni maha síwage cyɛ̂ɛnni.
Kafooŋi maha Kadɛsi kìni síwage cyɛ̂ɛnni.
9 Kafooŋi mɛjwuuni maha cèɲyi pyi yi i sini,
maa cire pyi tʼà ɲâharʼa pyi kàsofyan.
U pèente bage e,
yaayi puni maha ŋko:
«Pèente ti taha Kafooŋi na.»
10 Kafooŋi à u Saanre tìŋɛ lùbwoyi nìɲyii na.
Kafooŋi na ɲyɛ Saanre e fo tèekwombaa.
11 Kafooŋi maha fànhe kaan u shiinbilʼá,
Kafooŋi maha jwóŋi lwɔ́ u shiinbii na maa yyeɲiŋke kan pi á.