Kileɲarage yyefuge tèni i
28
Dawuda mɛɛni là.
Kafooŋi Kile,
mu mii ɲyɛ na yiri.
Mii kafaage,
ma hà ma niŋgyiini tò na yini yyaha na mɛ.
Ná mu ɲyɛ a mii yini shwɔ mɛ,
mii sí n-pyi mu à jwo mpii pi na ŋkɛ̀ɛge fanŋke e ke.
2 Mii aha mu ɲáare maa mu yyere,
maa na cyeyi yîrige mu pèepee bage niɲcɛnŋke kàmpanŋke na,
ɲwɔ na na,
ma a na ɲarayi shwɔ.
3 Ma hà na cû shinpiibii ná kakuumpyiibii cùŋkanni na mɛ.
Pire mpii maha pi shinɲɛɛbii yyeɲiŋke jwumpe yu pi ɲwɔyʼi,
mà li ta pege ɲyɛ pi zòompii na.
4 Pi sâra a tàanna ná pi kapyiiŋkii ná pi báarapege e.
Pi sâra a tàanna ná pi cyeyi kapyiini i.
Pi ná nde lʼà yaa ke,
lire pyi pi na.
5 Ɲaha kurugo yɛ,
pi ɲyɛ a Kafooŋi kapyiiŋkii ná u nimpyiini le ɲjire e mɛ.
Lire kurugo,
u sí pi kakyara,
pi saha sì n-yîri mɛ.
6 Kafooŋi u kêe,
ɲaha kurugo yɛ,
u à mii ɲarayi lógo.
7 Kafooŋi u ɲyɛ mii fànhe tatage ná mii tɔɔnte yabeŋke.
Mii à na sɔ̀nŋɔre puni taha u na,
ka u u mii cwɔhɔ.
Mii funntanga wuŋi u à sìi.
Mii sí myahigii cêe si u kêe.
8 Kafooŋi u ɲyɛ u wuubii fànhe.
Uru u ɲyɛ u shincwɔnrɔŋi kàshisulu kaaŋke si u shwɔ.
9 Ma shiinbii shwɔ,
maa jwó lwɔ́ pi na,
pire pi ɲyɛ mu wuubii.
Pyi pi kàanmucyafooŋi,
ma a pi le ma fukange ɲwɔhʼi tèrigii puni i.