Kafooŋi à mii sûlʼa ɲwɔ
27
Dawuda mɛɛni là.
Kafooŋi Kile u ɲyɛ mii bɛ̀ɛnmpe ná mii shwofooŋi,
jofoo na mii sí n-fyá yɛ?
Kafooŋi u ɲyɛ mii munaani sanɲcwɔnsigiŋi,
mii zòŋi sí n-kwɔ̀n jofoo yyaha na yɛ?
2 Shinpiibii ká mpa mii á
si mii sulugo naŋayapiye fiige,
pire pi ɲyɛ mii tunveebii ná mii zàmpɛɛnbii ke,
pi sí n-búrugo n-cwo.
3 Kàshicyaga mɛɛ ká mpa mii kwûulo,
mii zòmbilini sì n-sìi n-fyá mɛ.
Kàshige mɛɛ ká yîrige mii kurugo,
cyire mú i,
mii zòŋi sí n-tàra.
4 Kyaa niŋkin mii na ɲáare Kafooŋi á,
lire kyaa lʼà sìi mii na:
Lire li ɲyɛ,
mii u kwôro Kafooŋi bage e na shìŋi puni i,
sʼa Kafooŋi sìnampe wíi,
si u cya ɲcè u tatɛɛnge e.
5 Ɲaha kurugo yɛ,
u sí mii lèŋɛ u vàanŋke bage e canmpege,
si mii ŋwɔhɔ u vàanŋke bage kùruɲcwuunni i,
si mii dùrugo kafaaga ɲuŋʼi yaaga kà ŋkwɔ̀ na ta mɛ.
6 Numɛ,
mà mii zàmpɛɛnbii yaha pi à mii kwûulo,
mii ɲùŋke sí n-yîrige pi shwɔhɔlʼe.
Mii sí funntanga sáraya wwû Kile bage e,
mii sí pèente myahigii cêe Kafooŋi á.
7 Kafooŋi,
mii na mu ɲáare,
na ɲarage lógo,
ma a ɲùɲaara ta na na,
ma a na ɲwɔ shwɔ.
8 Mu à jwo:
«Yii a mii caa»
Ka mii i jwo:
«Kafooŋi,
mii na mu caa.»
9 Ma hà ŋwɔhɔ na na mɛ,
ma lùuni kà n-yîri si ma báarapyiŋi kɔ̀rɔ mɛ.
Mu u ɲyɛ mii tɛgɛfooŋi,
ma hà cye wwû na taan mɛ.
Ma hà ŋkàre si na yaha mɛ,
mii shwofooŋi Kile.
10 Mii tuŋi ná mii nuŋi mɛɛ ká mii cyé,
Kafooŋi sí mii lwɔ́.
11 Kafooŋi,
na taanna ma kuni karigii na,
ma a na yyaha cû kuntiini i na zàmpɛɛnbii yyaha na.
12 Ma hà na yaha na zàmpɛɛnbii cye e mɛ.
Ɲaha kurugo yɛ,
kafinivinibilʼà yîri mii kurugo ná kafuge e.
13 Kàmpyi mii mpyi a dá li na,
na mii sí Kafooŋi cɛ̀nmpe ɲya ɲyiishiinbii shwɔhɔlʼe ŋke ɲìŋke na mɛ,
di mii mpyi na sí n-pyi bɛ?
14 Kafooŋi ɲyii cyán,
maye shiile ma a ma zòŋi tàra.
Sèeŋi na,
Kafooŋi ɲyii cyán.