Shincɛnŋi kileɲarage
26
Dawuda mɛɛni là.
Kafooŋi Kile,
na tànga k an
ɲaha kurugo yɛ,
ɲcɛ̀ɛgɛ cyaga ɲyɛ mii na mɛ.
Mii à na sɔ̀nŋɔre taha Kafooŋi na,
yafyin sì n-jà mii cúnŋɔ mɛ.
2 Na sugurʼa fyiinnɛ Kafooŋi,
na funŋɔ karigii ná na zòmbilini karigii suguro,
3 ɲaha kurugo yɛ,
mu cɛ̀nmpe mii na wíi,
maa ɲaare na ntaanni ná mu sèeŋi i.
4 Mii ɲyɛ na ntɛ̀n ná kafinivinibilʼe mɛ,
mii mú ɲyɛ na jyè ɲwɔmyahii shuunni feebii kyalʼe mɛ.
5 Kapimpyiibii ŋgwòŋi kyalʼà sàa pɛn mii á,
mii ɲyɛ na filili shinpiibii na mɛ.
6 Mii à na cyeyi jyé fyìnmpe e,
si nta n-file mu sárage tawwuge na,
Kafooŋi,
7 si mu kacɛɛnŋkii cêe mɛɛ,
si mu kabwɔhigii puni kyaa jwo.
8 Kafooŋi,
mu bage ntɛ̀ɛnŋʼà táan mii á,
wani mu sìnampe bɛ̀ɛnmpe na ɲî.
9 Ma hà mii ná kapiimpyiibii munahigii wwû siɲcyan mɛ,
ma hà na bò ná shinbuubilʼe mɛ.
10 Pire cyeyʼà myîgimɛ kapegigilʼe,
pi kàniŋɛ cyeyʼà ɲî numpire kaŋkuruyi na.
11 Ŋka mii na ɲaare fyìnmpe e.
Ɲwɔ na na,
ma a na shwɔ.
12 Mii tooyi na ɲyɛ ntìiŋi kuni i,
mii sí Kafooŋi kêe supyikuruyi shwɔhɔlʼe.