Yyefugofoo kileɲarage
25
Dawuda mɛɛni là.
Kafooŋi Kile,
mii à naye tíiŋɛ mu na.
2 Mii à dá mu na,
mii Kileŋi,
ma hà na yaha sì n-sílige mɛ,
ma hà na zàmpɛɛnbii yaha pi cyaha na na mɛ.
3 Mpii pi à pi sɔ̀nŋɔre taha mu na ke,
uru wà sì n-sílige mɛ,
ŋka mpii pi à ɲùŋɔ kyán mu na ke,
pire sí n-sílige.
4 Kafooŋi,
ma kuni cyêe na na,
ma a na taanna li ɲaaraŋkanni na.
5 Ta na kɛ̂ɛnŋi ná ma sèeŋi i maa na kâla,
ɲaha na yɛ,
mu u ɲyɛ mii shwofooŋi Kile.
Mii à na sɔ̀nŋɔre taha mu na canŋa maha canŋa.
6 Kafooŋi,
funŋɔ cwo li na,
na mu u ɲyɛ ɲùɲaare
ná cɛ̀nmpe foo mà lwɔ́ fo taɲjaa na.
7 Yàfa mii nàɲjiwuŋi ŋguruŋi ná kapegigii nimpyiiŋkii na.
Kafooŋi,
yaha na na,
ma tàanna ná ma cɛ̀nmpe ná ma kacɛɛnŋkilʼe.
8 Kafooŋi à ɲwɔ maa ntíi.
Lire kurugo,
u maha kuni cyêre kapimpyiibii na.
9 Mpii pi à piye tîrige ke,
u maha ntìiŋi kuni le pire taan,
u maha u kuni cyêe pire na.
10 Kafooŋi kurigii puni na ɲyɛ cɛ̀nmɛ ná ɲwɔmɛfenɛ,
u tunmbyaare karigii pyifeebii ná u sàliyaŋi kurigii ɲaarafeebilʼá.
11 Kafooŋi,
mu mɛge kurugo,
na kapegigii niɲyahigii yàfa na na.
12 Kafooŋi yyahafyagare na ɲyɛ ŋgemu i ke,
kuni urufolʼà yaa u lwɔ́ ke,
u sí lire cyêe urufoo na.
13 Urufoo sí n-pyi yyeɲiŋke e,
kìni sí n-pyi u tùluge wuu.
14 Kafooŋi sí u yyahafyagarefeebii le u ŋgwòŋi i,
u sí pi taanna u tunmbyaare karigii na.
15 Mii ɲyiigilʼà le Kafooŋi i tèrigii puni i,
ɲaha kurugo yɛ,
uru u sí n-jà mii tɔɔge wwû kànhaŋke e.
16 Yyaha kɛ̂ɛnŋʼa na wíi ma a ɲùɲaara ta na na,
ɲaha kurugo yɛ,
mii ɲyɛ naye niŋkin maa ŋkyaali.
17 Mii zòmbilini funmpɛɛnre na ɲyahage na wà,
na yige na cwɔ̀nrɔmpe e.
18 Na kyaage ná na yyefuge wíi,
ma a na kapegigii puni yàfa na na.
19 Na zàmpɛɛnbii ɲyahaŋkanni wíi,
pɛnŋkanni na mii à pɛn pi á ke,
ma a lire wíi.
20 Yaha na na,
ma a na munaani shwɔ,
bà mii sí mpyi mii àha ŋkwɔ̀ zílige,
mà lire ɲùŋke pyi mii à naye tíiŋɛ mu na mɛ.
21 Yaha na na,
zòvyinre ná ntìiŋi kurugo,
ɲaha na yɛ,
mu na mii à na sɔ̀nŋɔre taha.
22 Ei Kile,
Izirayɛli shwɔ,
u shwɔ u cwɔ̀nrɔmɔ karigii puni na.