Shinŋi u sí n-jà ɲjè Kafooŋi pèente bage e ke
24
Dawuda mɛɛni là.
Ɲìŋke ná ku ɲuŋɔ yaayi puni ɲyɛ Kafooŋi Kile wuyo,
diɲyɛŋi ná u funŋɔ yaayi puni mú ɲyɛ u wuyo.
2 Ɲaha kurugo yɛ,
uru u à ɲìŋke ɲwɔhɔ cyán suumpe lwɔhe ɲuŋʼi,
maa ku tígilʼa yyéeŋɛ lwùcyeyi ɲuŋʼi
3 Jo u sí n-jà n-dùgo Kafooŋi ɲaŋke na yɛ?
Jo u sí n-jà n-yyére u cyage niɲcɛnŋke e yɛ?
4 Shinŋi cyeyi yʼà fíniŋɛ,
u zòŋi sì ɲyɛ a ɲwɔ́hɔ mɛ,
ná u ɲyɛ na ɲɛɛge kafinaare na mɛ,
ná u ɲyɛ na ŋkâre kafinaare ɲuŋɔ taan mɛ.
5 Urufoo sí Kafooŋi jwóŋi ta,
si ntìiŋi ta u shwofooŋi Kile á.
6 Kafooŋi,
sùpyire ti ɲyɛ na mu caa ke,
amuni tire ɲyɛ,
Mpii pi à piye waha maa mu Yakuba u Kileŋi caa si ɲya ke,
amuni pire ɲyɛ.
Shelaa
7 Tajyiɲwɔyi ŋkunnuyi yi yîrige sèlʼe,
tèrigii puni tajyiɲwɔyi ŋkunnuyi yi múgo sèlʼe.
Saanbwɔhe si jyè.
8 Jofoo u ɲyɛ kuru saanbwɔhe yɛ?
Fànhe foo Kileŋi,
ná Siŋi Punifoo wi!
Kàshikwɔnmpege Kile wi.
9 Tajyiɲwɔyi ŋkunnuyi yi yîrige sèlʼe,
tèrigii puni tajyiɲwɔyi ŋkunnuyi yi múgo sèlʼe,
saanbwɔhe si jyè.
10 Jofoo u ɲyɛ kuru saanbwɔhe yɛ?
Fànhe foo Kileŋi ná Kàshikwɔnmpege ki.
Uru u ɲyɛ saanbwɔhe.
Shela