Yyefugofoo kileɲarage
22
Mɛceŋkuruŋke yyaha yyére shinŋi.
Mɛɛni lʼà cêe ɲyɛmugoɲwɔge kyaare kyaa na ke.
Dawuda mɛɛni là.
2 Mii Kileŋi,
mii Kileŋi,
ɲaha na mu à kàntugo wá mii à yɛ?
Ɲaha kurugo mu à laaga tɔɔn mii na amɛ fo mu ɲyɛ na mii parage núru si mii tɛ̀gʼa yɛ?
3 Mii Kileŋi,
mii à mu yyere canŋke e,
ŋka mu ɲyɛ a mii ɲwɔ shwɔ mɛ.
Numpilage e,
yyeɲiŋɛ ɲyɛ mii na mɛ.
4 Lire ná li wuuni mú i,
mu à tɛ̀ɛn ma saanre tatɛɛnge e,
mu niŋkinŋi u ɲyɛ Kileŋi sèe wuŋi,
Izirayɛli shiinbilʼà kwôro na ŋgemu kêre ke.
5 Wuu tulyeyi mpyi a yiye tíiŋɛ mu na,
pi mpyi a pi sɔ̀nŋɔre taha mu na,
ka mu u pi shwɔ.
6 Pi à mɛɛ wà mu á,
ka mu u pi shwɔ,
pi à piye tíiŋɛ mu na,
mu ɲyɛ a pi sílige mɛ.
7 Ŋka mii wi ke,
mii à pyi fyɛngɛ,
mii ɲyɛ sùpya mɛ.
Sùpyire na mii fare,
pi ɲyɛ a mii yaha laagʼe mɛ.
8 Shin maha shin u à mii ɲya ke,
uru maha mii fwɔhɔre.
Pi maha ɲcyahali mii na,
fo maha pi ɲùɲyi kwôre,
9 maa ŋko:
«U à uye tíiŋɛ Kafooŋi Kile na,
na u sí uru shwɔ,
u u shwɔ kɛ!
Taha u kyaa ɲyɛ a táan u á mɛ!»
10 Ŋka Kafooŋi,
mu u à mii yige na nuŋi funŋke e,
mà mii yaha na nuŋi ntùŋke e,
mu à yaha mii na.
11 Mii à kan mu á mii tèesiini i,
mà lwɔ́ mii nuŋʼà mii si ke,
mu à pyi mii Kileŋi.
12 Ma hà laaga tɔɔn na na mɛ,
ɲaha na yɛ,
yyefwugʼà nɔ,
tɛgɛfoo sì ɲyɛ mii na mɛ.
13 Nupyɛhii niɲyahigilʼà mii kwûulo,
Basanŋi fànhaɲyahaga nupyɛhigilʼà mii kwûulo kànmpanɲyi puni na.
14 Mii zàmpɛɛnbilʼà ɲwɔyi múgo mii kurugo,
mu à jwo cànraga ku ɲyɛ na kyara kyàa maa ŋkyànge.
15 Mii fànhe na ŋkɛ̀ɛge mu à jwo lwɔhɔ ku ɲyɛ na fwu na ntùuli,
mii kaciiyi punʼà cúnŋɔ cúnŋʼa láha yiye na.
Mii zòŋʼà ɲa mii funŋke e mu à jwo kùro.
16 Mii fànhʼà kwɔ̀ mu à jwo puwara.
Mii ɲjinʼà tàra mii ɲjirintaŋi na.
Mu à mii sínniŋɛ kwùŋi pwoore e.
17 Mpwuunbilʼà mii mâhana a cyíri,
kakumpyiibilʼà mii kwûulo.
Pi à mii cyeyi ná mii tooyi fúrugo.
18 Mii sí n-jà na kaciiyi puni tɔ̀rɔ.
Mii zàmpɛɛnbii na mii wíi,
mii à pyi yawiige.
19 Pi à mii vàanɲyi taa piye na.
Pi à ŋkyaanlwooni tɛ̀gʼa mii vàanntinmbwɔhe táa piye na.
20 Kafooŋi,
ma hà laaga tɔɔn na na mɛ.
Mu u ɲyɛ mii fànhe tatage ke,
ta fyâa ma a ma a pa na tɛ̀gɛ.
21 Na shwɔ kàshikwɔnŋwɔɔni na.
Na shwɔ pwuunbii ŋkyànhigii na.
22 Na shwɔ cànrage ɲwɔge na,
maa na shwɔ sigenuŋi ɲɛɛnŋkii na.
Mu à mii ɲwɔ shwɔ!
23 Mii sí mu kyaa jwo na cìnmpyiibilʼá.
Mii sí mu kêe mu sùpyiibii nimbinnibii shwɔhɔlʼe.
24 Mpii pi ɲyɛ na fyáge Kafooŋi na ke,
yii a u kêre.
Yii Yakuba tùluge shiinbii puni,
yii a u pêre.
Yii Izirayɛli tùluge shinnbii puni,
yii a fyáge u na.
25 Ɲaha kurugo yɛ,
shinŋi u ɲyɛ cwɔ̀rɔmpe e ke,
u ɲyɛ a uru faha mɛ,
u ɲyɛ a uru cyé mɛ.
U ɲyɛ a u yyahe ŋwɔhɔ u na mɛ,
ŋka tèni i u à mɛɛ sú u fyè e ke,
u à u ɲwɔ shwɔ.
26 Mii sí mu kêe supyikurumbwɔhɔ shwɔhɔlʼe,
mii sí na ɲwɔfaayi wwû,
kileyyahafyagare feebii shwɔhɔlʼe.
27 Cwɔ̀nrɔmɔfeebii sí n-lyî n-tìn,
mpii pi ɲyɛ na Kafooŋi caa ke,
pire sí fwù kan u á,
si shìtɔɔnwɔ ta.
28 Ɲìŋke sùpyiibii puni pi sɔ̂nŋɔ Kafooŋi na,
pi i núrʼa piye kan u á.
Tùluyi puni sùpyiibii pi niŋkure sín u yyahe taan.
29 Ɲaha kurugo yɛ,
Saanre ɲyɛ Kafooŋi woro,
uru u ɲyɛ supyishiŋi puni ɲuŋɔ na.
30 Ɲìŋke shinbwoobii puni sí n-lyî,
si niŋkure sín u yyahe taan.
Mpii pi sí n-le pwoore e,
mà bâra mpii pi sí n-kwû ke,
pire puni sí niŋkure sín u yyahe taan.
31 Tùluge kà sí raa Kafooŋi pêre,
u kyaa sí n-jwo yyeɲwɔɲyi nimpaɲyʼá
32 Pyìibii pi sí n-pa si ke,
u ntìiŋi kyaa sí n-jwo pirʼá,
ɲaha kurugo yɛ,
u aha ndemu jwo ke,
u maha lire pyi.