Saanŋi à fwù kan Kile á
21
Mɛceŋkuruŋke yyaha yyére shinŋi,
Dawuda mɛɛni là.
2 Kafooŋi Kile,
saanŋi na múguri mu fànhe kurugo.
U na ɲyɛ funntange e ɲaha kurugo yɛ,
mu à u pyi javoo.
3 Yaage kani li mpyi u zòmbilini na ke,
mu à kuru kan u á,
u ɲwɔge mpyi a yaage ŋkemu ɲáare ke,
mu ɲyɛ a cyé si kuru kan u á mɛ.
Shelaa
4 Mu à u ɲùŋɔ bɛ̂ ná jwó niɲyahawʼe,
mu à sɛɛnŋi sèe wuŋi saanre ɲùntoŋke tò u ɲùŋke na.
5 U à mu ɲáare shìŋi na,
ka mu u u kan u á.
Mu à shìtɔɔnwɔ kan u á,
u niŋkwombaawa.
6 Mu à u shwɔ ke,
lirʼà ɲjire taha u na sèlʼe.
Mu à sìnampe ná pèente kan u á kacɛnŋkuuro fiige.
7 Mu à u pyi fo tèekwɔmbaa jwó pyà.
Mu à u ɲî funntange na,
ma yyahe taan.
8 Kafooŋi na saanŋʼà u sɔ̀nŋɔre taha.
Kileŋi nìɲyiwuŋi cɛ̀nmpe kurugo,
yafyin sì n-jà u cúnŋɔ mɛ.
9 Saanŋi,
mu cyɛge sí mu zàmpɛɛnbii puni cû,
mu kàniŋɛ cyɛge fànhaɲyahaga woge sí mu màpɛnge feebii puni cû.
10 Mu aha maye cyêe tèni ndemu i ke,
mu sí pi súugo ná nabwɔhʼe.
Kafooŋi lùyirini sí pi jò,
nage sí pi súugo fo si ŋkwɔ̀ pi na.
11 Mu sí pi shi pînniŋɛ ɲìŋke na,
si pi tùluge shi tò sùpyire shwɔhɔlʼe.
12 Pi à vùnŋɔ pwɔ mu na,
kapii li ɲyɛ pi funŋʼi mà yyaha tíi ná mu i,
ŋka pi sì n-jà mɛ.
13 Ɲaha kurugo yɛ,
mu aha ma sintaage dìri,
maa tàanŋi tɛ̀gʼa pi ŋwɔ,
pi sí n-fê.
14 Kafooŋi,
ma sífente fànhaɲyahaga woore cyêe.
Wuu sí myahigii cêe si mu pêe ma sífente kurugo.