Saanŋi Kile ɲárage
20
Mɛɛni Dawuda à yaa ka li i ŋkan mɛceŋkuruŋke yyaha yyére shinŋʼá ke.
2 Cwɔ̀rɔmpe canŋke Kafooŋi Kile u ma ɲarage shwɔ.
Yakuba u Kileŋi yabiliŋi u a mpàa ma na.
3 U ma tɛ̀gɛ mà u yaha u bage e,
mà u yaha Siyɔn ɲaŋke ɲuŋʼi,
u ma ɲwɔhɔ tò.
4 U àha funŋɔ wwɔ̀ ma yakange kà tufiige na mɛ,
u ɲɛɛ ma sárayi nizogoyi na.
Shela a
5 Nde mu zòmbilini ɲyɛ na ɲcaa ke,
u lire kan ma á,
u ma cyeleŋkarigii puni ɲwɔ!
6 Lire e,
wuu funtanga wuubii sí raa yini mu sítaare kurugo.
Wuu sí dìrapoŋi yîrige wuu Kileŋi mɛge na.
Mu à yaaga maha yaaga cya Kafooŋi á ke,
u ku kan ma á!
7 Numɛ mii à li cè na Kafooŋi à u niɲcwɔnrɔŋi shwɔ,
mà u yaha u nìɲyiŋi tatɛɛnge e,
u à u ɲwɔ shwɔ,
u à u ɲùŋɔ wwû u kàniŋɛ cyɛge fànhe cye kurugo.
8 Pìi u sɔ̀nŋɔrʼà taha pi yukwɔn wòtorobii na,
pìi sʼà pi sɔ̀nŋɔre taha pi shwɔnyi na.
Wuu pi ke,
wuu fànhe ku ɲyɛ,
mà wuu Kafooŋi yyere.
9 Pire mpii fànhe maha mpa ɲcyɛ́rɛ pi asi ɲcwo ɲìŋke na,
wuu pi ke,
wuu maha yyérʼa ɲwɔ.
10 Kafooŋi,
saanŋi shwɔ,
u u jà a wuu ɲwɔ shwɔ,
wuu aha u yyere u wuu tɛ̀gɛ tèni demu i ke!