Kile à uye cyêe u yadayi cye kurugo
19
Mɛceŋkuruŋke yyaha yyére shinŋi,
Dawuda mɛɛni là.
2 Nìɲyiŋi cyeyi na Kile sìnanmpe kyaa yu.
Nìɲyiŋi shwɔ̀hɔŋi na u báaraŋi nimpyiŋi cyêre.
3 Canmbilini nintoroni maha pu kyaa jwo canmbilini nimpanʼá.
Numpilage nintoroge maha pu ɲcèŋi kan numpilage nimpaŋkʼá.
4 Lire ɲyɛ na mpyi ná shɛnre e mɛ,
li ɲyɛ na mpyi ná ɲwɔjwumʼi,
sùpya niŋgyii sí mpemu lógo mɛ.
5 Lire ná li wuuni mú i,
kàlaŋi yi maha ŋkaan ke,
uru maha nɔni ɲìŋke cyeyi puni i.
Yi jwumpe maha sì fo diɲyɛŋi tɛgɛni na,
Kile à nìɲyiŋi yaa maa u pyi canŋaɲyiini bage.
6 Li na ɲyɛ mu à jwo cifɔnŋɔ poo,
ŋgemu u na fwore u tashwɔnge e ke.
U funntangawuŋi u ɲyɛ bà kajaŋa maha kajatafɛɛrɛ sìi mɛ.
7 Li maha yîri nìɲyiŋi ɲùŋke kà na,
maha sà ɲcwo ɲùŋke sanŋke na.
Yafyin sì n-jà ŋwɔhɔ li kafuge na mɛ.
8 Kafooɲi Kile sàliyaŋi à fûnŋɔ,
u maha fànfɔnŋke leni sùpyaŋi munaani i.
Kafooŋi kàlaŋi na ɲyɛ sêe,
u maha yákilifente kaan kayyahaɲcembaabilʼá.
9 Kafooŋi sàliyaŋi à tíi.
U maha sùpyaŋi funŋke pyi kʼà táan.
Kafooŋi toŋi na ɲyɛ bɛ̀ɛnmɛ.
ti sí n-kwôro fo tèekwombaa.
Kafooŋi yukyaani karigii ɲyɛ sêe,
cyii punʼà tíi.
11 Cyi à pwɔrɔ sɛɛn na,
cyi à pwɔrɔ ali sɛɛnŋi yabiliŋi na.
Cyi à táan sɛrɛ na,
cyi à táan ali sɛɛre yabiliŋi na.
12 Kafooŋi,
mii u ɲyɛ mu bilinaŋi ke,
cyi maha mii yɛrɛge.
Tɔ̀ɔn nimbwo na ɲyɛ cyi kurigii ɲaraŋi i.
13 Jofoo u à u ŋgwuruŋi puni cè yɛ?
Kapegii mii à pyi naye pàama ke,
cyire yàfa na na.
14 Na shwɔ yàmpeente karigii na,
cyi àha sìi fànha ta na na mɛ.
Lire ká mpyi,
mii sí mpyi ɲcɛ̀ɛgɛcyaga bàa,
si fíniŋɛ kapegigii kàmpanŋke na.
15 Na jwumpe ná na zòmbilini sɔ̀nŋɔre yaha ti táan ma á,
Kafooŋi,
mii kafaage ná mii ɲùŋgwufooŋi.