Saanŋi Dawuda à fwù kan Kile á
18
Mɛceŋkuruŋke yyaha yyére shinŋi,
mɛɛni,
Kafooŋi Kile báarapyiŋi Dawuda à cêe ke.
Dawuda à nde mɛɛni cêe,
tèni i Kafooŋi à u shwɔ u zàmpɛɛnbii puni na ke,
mà cye cyán Soli na.
2 U à jwo:
Kafooŋi,
mu u ɲyɛ mii fànhe,
mu kyalʼà táan mii á.
3 Kafooŋi u ɲyɛ mii kafaage
ná mii kàshisulubage ná mii shwofooŋi.
Mii Kileŋi u ɲyɛ mii taŋwɔhɔge kafaage
ná mii tɔɔnte yabeŋke ná mii shwofooŋi fànha wuŋi ná mii sanɲcwɔnsigiŋi.
4 Kafooŋi u kêe,
mii à u yyere ka u u mii yige na zàmpɛɛnbii puni cye e.
5 Kwùŋi yapwɔyi mpyi a mii pwɔ,
kakyaare lufoompe mpyi a mii ɲuŋɔ jò.
6 Sèe wi,
kwùŋi yapwoyi mpyi a mii pwɔ,
kwùŋi kànhaŋke mpyi a mii cû
7 Mà mii yaha nàvunŋke e,
mii à Kafooŋi yyere,
Mii à mɛɛ wà Kile á,
u à lógo mii ɲwɔ na,
mà u yaha u bage e.
Yirigii mii à pyi ke,
cyirʼà jyè u niŋgyigilʼe.
8 Ka ɲìŋke si ɲcyɛ̂ɛnɛ,
ka ɲanyi si ɲcúnŋɔ ɲcúnŋɔ yi tatɛɛnyi i,
yi punʼà ɲyànha ɲyànha Kafooŋi lùyirini cye kurugo.
9 Ŋguruge mpyi na dùru na fwore u munawyiigilʼe
nagʼà fworo u ɲwɔge e zògoŋi kurugo,
naŋkyanhagilʼà fworo u ɲwɔge e.
10 U à nìɲyiŋi fɛ̂ɛn maa ntîge,
ɲahanŋa niŋgwɔhɔ mpyi u tooyi ɲwɔhʼe.
11 U à dùgo Sherubɛnŋi na maa yîri,
u mpyi na ntîri kafɛɛge e.
12 U à numpini pyi u tatɛɛnge.
U à ŋwɔhɔ ɲanhaŋke niŋgwɔhe lwɔhe woge numpini i.
13 Bɛ̀ɛnmpe pu mpyi na ɲî u yyaha na ke,
ɲanhayi ná zànhafunɲcɛɛnɲyi ná naŋkyanhagilʼà fworo purʼe.
14 Ka Kafooŋi si ntîn nìɲyiŋi i,
Kileŋi nìɲyiwuŋi mɛɛnʼà fworo zànhafunɲcɛɛnɲyi ná naŋkyanhagii shwɔhɔlʼe.
15 U à u tàanbii ŋwɔ maa mii zàmpɛɛnbii caala.
U maha kileɲiŋkii tɛ̀gʼa pi tîn a caala.
16 Kafooŋi,
mu à pi fùguro ná ma lùyirini kafɛɛge e ke,
lirʼà suumpe lwɔhe nafyiini yige cyíinŋi na,
ka ɲìŋke nitaani si ɲya.
17 U à u cyɛge yige nìɲyiŋi i ma tîrige ɲìŋke na maa mii cû.
U à mii dìrʼa yige lùbwɔhe e.
18 U à mii shwɔ mii zàmpɛɛnbii fànhaɲyahaga wuubii na,
ná mii yukwɔnɲɛɛnbii pi à fànha tò mii na ke.
19 Mii cwɔ̀nrɔmpe canŋke,
pi à pa ɲcwo mii na,
ŋka Kafooŋi à mii tɛ̀gɛ.
20 U à mii yige cwɔ̀nrɔmpe e,
maa mii shwɔ,
ɲaha kurugo yɛ,
mii kyalʼà táan u á.
21 Kafooŋi à jwô le mii á,
mà tàanna ná mii ntìiŋi i,
u à li ɲya na mii cyeyʼà fíniŋɛ,
u à mii sâra a tàanna ná na nimpyiini i.
22 Ɲaha na yɛ,
mii à Kafooŋi kurugii ɲaara,
mii ɲyɛ a cyé na Kileŋi na,
maa naye kan kapiini á mɛ.
23 Mii ɲyiini na ɲyɛ u toŋi kurugii na tèrigii puni i,
u à kyaa maha kyaa jwo ke,
mii ɲyɛ a li là wílʼa fô mɛ.
24 Mii tìgire cyaga bàa wu u ɲyɛ u yyahe taan,
mii à jà naye na kapegii kàmpaŋke na.
25 Lire e,
Kafooŋi à mii sâra mà tàanna ná mii ntìiŋi i.
U à mii sâra na mii cyeyʼà fíniŋɛ.
26 Ŋgemu ká mpyi ɲwɔmɛɛ foo ná mu i ke,
mu maha mpyi ɲwɔmɛɛ foo ná urufole e.
Ŋgemu ká mpyi tìgere cyaga bàa ke,
mu ɲyɛ na tìgere cyaga taa uru na mɛ.
27 Shinŋi u ɲyɛ ná zòvyinre e ke,
mu maha urufoo cû a tàanna ná lire e,
Ŋka shinŋi u ɲyɛ ná funkyange e ke,
mu maha urufoo cû a tàanna ná u funŋkyange e.
28 Sùpyire tʼà tiye tírege ke,
mu maha tire shwɔ,
ŋka mpii pi à piye pêe ke,
mu maha pire ɲùɲyi sôgo.
29 Mu u ɲyɛ na mii fùkinaŋi pyi u u bɛ̀ɛnmpe yige,
Kafooŋi,
mii Kileŋi,
mu u maha numpini pyi mii á bɛ̀ɛnmɛ.
30 Mu cyekurugo mii maha ŋkà a tò kàshicyage na,
mu cyekurugo mii Kileŋi,
mii maha jà a yi kàsɔɔge na.
31 Kile kurugilʼà fûnŋɔ,
Kafooŋi jwumpʼà tàra,
mpii pi à piye tíiŋɛ u na ke,
u na ɲyɛ pirʼá tɔɔnɔ yàbeŋɛ.
32 Jo u ɲyɛ Kile ná Kafooŋi balʼa yɛ?
Jo u ɲyɛ kafaage ná wuu Kileŋi balʼa yɛ?
33 Uru Kile u maha fànhe kaan mii á,
maa mii yyaha cwôre kuntiini i.
34 U maha mii tooyi pyi cèŋɛ wuyo fiige,
u maha mii pyi mii à yyére tùmpuɲuŋke ɲuŋʼi.
35 U maha mii cyeyi taanni kàshige pyiŋkanni na.
Fo maha fànhe kan mii cyeyʼá,
yʼà jà a dàɲyɛŋi tɔɔnte sintaage dìri
36 Mu à ma tɔɔnte yabeŋke kan mii á,
maa mii shwɔ,
mu à ma kàniŋɛ cyɛge tɛ̀gʼa mii cwɔhɔ,
mu kacɛɛnŋkii maha là bârali mii na.
37 Mu à kuni múgo mii tooyʼá,
mii tooyi sì ntɛ̂rɛ mɛ.
38 Mii maha na zàmpɛɛnbii puni fyè tɔ̀rɔ fo maha cye taha pi na,
Mii sí ɲyɛ na núruli ná pi ɲyɛ a kwɔ̀ mɛ.
39 Mii sí pi bwɔ̀n fo pi wà saha sì n-jà n-yîri mɛ,
pi sí n-cwo n-sànhana mii tooyʼe.
40 Mu à fànha kan mii á kàshige mɛɛ na,
mu à mii zàmpɛɛnbii kúrulo mii tooyʼe.
41 Mu à mii zàmpɛɛnbii pyi pi à fê mii yyaha na,
mii màpɛnge ɲyɛ mpimu i ke,
mii sí pire puni shi tò
42 Pi à mɛɛ wà ntɛ̀gɛŋi kurugo,
ŋka wà ɲyɛ a pa pi tɛ̀gɛ mɛ,
pi à Kafooŋi yyere,
ŋka u ɲyɛ a pi ɲwɔ shwɔ mɛ.
43 Mii à pi mbyimɛ wwû kafɛɛge kʼà lwɔ́,
mii à pi pyi keekuuŋi yɔɔge fiige.
44 Mu à mii shwɔ supyikyanyi na,
maa mii tìŋɛ supyishiŋi ɲuŋɔ na,
mii mpyi a uru ŋgemu cè mɛ,
ka u u ŋkúu mii á.
45 Tèni i pi à mii mɛjwuuni lógo ke,
pi à ɲɛɛ mii jwumpe na,
supyishiŋi sanŋi sí raa mii mɛtanga yu.
46 Supyishinŋi sanŋʼà fyá sèlʼe,
pi nivworobii pi kàshisulubage e,
pi na ɲcyɛ̂ɛni.
47 Kafooŋi na ɲyɛ ɲyii na,
mii à u kêe,
uru u ɲyɛ mii kafaage.
Mii shwofooŋi à pêe.
48 Kile u maha mii ŋkooŋi wwû,
uru u maha supyishiŋi sanŋi pyi u à kúu mii á,
49 Uru u à mii shwɔ na zàmpɛɛnbii na,
mpii pi à ntùŋke taha mii na ke,
maa mii pyi mii à sí ta pire na,
mu à mii shwɔ supyikyanyi na.
50 Lire kurugo Kafooŋi,
mii sí fwù kan mu á supyishiŋi shwɔhɔlʼe,
mii sí raa mu mɛtanga yiri na myahagilʼe.
51 Saanŋi Kafooŋi à cwɔnrɔ ke,
u maha zhwoŋi kabwɔhɔgii pyi urʼá,
u maha u ɲùɲaare tɛgɛlɛ bàa woore cyêre Dawuda ná u tùluge shiinbii na fo tèekwɔmbaa.