Yyefugofoo kileɲarage
17
Dawuda kileɲarage.
Kafooŋi Kile,
na ɲaarege lógo,
ɲaha na yɛ,
kʼà tíi.
Na kwuuni lógo,
maa na tɛ̀gɛ,
niŋgwiini cyán na ɲarage na,
mii ɲwɔge ɲyɛ na finni mɛ.
2 Na tànga kan ma ɲwɔge e.
Mu ɲyiigii cyi sèeŋi ɲya.
3 Mu à mii zòmbilini kàanmucya,
mu à pa fworo mii na numpilage e.
Mu à mii kàanmucya,
mu ɲyɛ a yafyin ɲya mii na mɛ.
Mii ɲwɔjwumpe ná mii funzɔnŋɔrʼà pyi niŋkin.
4 Mii à sùpyire kapyiŋkii ɲya,
ŋka mii à mu ɲwɔmɛɛni cû.
Mii à laaga tɔɔn shinpiibii kurugii na.
5 Kuni mu à le mii taan ke,
mii à kwôro lire e.
Mii tɔɔge ɲyɛ a tɛ̂rɛ mɛ.
6 Ei Kile!
Mii na mu yiri,
ɲaha kurugo yɛ,
mu maha mii ɲwɔ shwuu.
Ma niŋgwiini táan na jwumpe na
maa na ɲarage lógo.
7 Ma cɛ̀nmpe kakyanhala wumpe cyêe na na,
Mpii pi à piye tíiŋɛ mu na ke,
mu maha pire shwuu
pi zàmpɛɛnbii na.
8 Yaha na na,
bà mu à yaha ma ɲyiini na mɛ.
Na yalʼa ŋgwɔhɔ ma fukange mbyimpe e.
9 Shinpiibii pi ɲyɛ na mii kyérege ke,
na shwɔ pire na,
shinbuzàmpɛɛnbii pi à mii kwûlo ke,
na laage tɔɔn pire na.
10 Ɲùɲaara ɲyɛ pi zòmpyaagilʼe mɛ,
pi ɲwɔyʼà ɲî yàmpeente jwumpe na.
11 Pi à mii fyè tɔ̀rɔ,
numɛ pi à mii kwûlo.
Pi na mii peeli si mii bwɔ̀n ɲcyán ɲìŋke na.
12 Pi na ɲyɛ mu à jwo cànraga katege wogo ku ɲyɛ na ku ɲjìŋi caa,
mu à jwo cànrayaaga ku ɲyɛ taŋgwɔhɔge e.
13 Kafooŋi,
yîri pi kurugo maa pi funŋɔ kani fyìinɛ.
Ma kàshikwɔn ŋgwɔɔni lwɔ́ maa na shwɔ shinpiibii na.
14 Na shwɔ sùpyire na,
ná ma cyɛge fànhe e,
Kafooŋi na shwɔ ŋge tìiŋi sùpyire na,
pi nàzhanŋi pyi ŋge diɲyɛŋi kanni.
Nde mu à bégelʼa yaha pi yyaha na ke,
lire kan pi á,
pi ná pi pyìibii,
maa li sanni yaha pi ɲampirʼá.
15 Mii wi ke,
ntìiŋi funŋke e,
mii sí mu yyaha ɲya,
mii aha ɲɛ̀ tèni ndemu i ke,
mii sí mu yyahe ɲya,
lire sí mii funŋke ɲíŋɛ.