Sùpyaŋʼà yaa u u sɔ̀nŋɔre taha Kile na
16
Dawuda mɛɛni là.
Kile,
ta na sanɲcwɔnŋi sigili,
Ɲaha kurugo yɛ mii à naye tíiŋɛ mu na.
2 Mii à yi jwo Kafooŋi Kile á na:
Mu u ɲyɛ mii Kafooŋi,
mu à fànha tò yaayi puni na mii á.
3 Mu wuubii pi ɲyɛ kìni i ke,
pire pi ɲyɛ shinbwoobii,
pi kanʼà mii funŋke táan.
4 Mpii pi à taha yasunŋke kabɛrɛ fye e ke,
Là maha bârali pire u yyefuge na,
mii sì n-wwû ná pi e pi sárayi sìshyan wuyi i mɛ.
Mii ɲwɔnge sì pi yasunɲyi mɛge yyere mɛ.
5 Kafooŋi u ɲyɛ mii nàzhan taage,
uru u maha yaayi puni kaan mii á,
mii nùmpanŋke ɲyɛ u cye e.
6 Taage Kafooŋi à kan mii á ke,
kurʼà ɲwɔ sèlʼe,
Sèe wi,
mii à kɔɔgɔ niɲcɛnŋɛ ta.
7 Mii fwù ɲyɛ Kafooŋi na,
uru u ɲyɛ mii yɛrɛfooŋi,
ali numpilage e,
kuru funŋke ku maha mpyi mii i.
8 Mii na sɔ̂nŋi Kafooŋi na tèrigii puni i,
mà u yaha ná mii i yafyin sì n-jà mii ta mɛ.
9 Lire kurugo mii ɲyɛ funntange e,
mii munaani na yógore,
yafyin mú sì mii cyeere ta mɛ.
10 Ɲaha kurugo yɛ,
mu sì ɲɛɛ mii munaani yaha kwùŋi cye e mɛ,
mu sì ɲɛɛ ma báarapyiŋi niɲcɛnŋi yaha u kwôro fanŋke e mɛ.
11 Mu sí shìŋi kuni cyêe mii na,
funtange ɲyɛ mu yyahe taan tèrigii puni i,
mii funtanga wuŋi u ɲyɛ tèrigii puni i mu ŋkère na.