Jo u sí n-jà n-file Kile na yɛ?
15
Dawuda mɛɛni là.
Kafooŋi Kile,
jo u sí n-tɛ̀ɛn mu vàanŋke bage e yɛ?
Jo u sí n-tɛ̀ɛn mu ɲaŋke nisinanŋke ɲuŋʼi yɛ?
2 Shinŋi u ɲyɛ na ɲaare kuni nintiini i,
maa katiigii pyi,
maa sèeŋi yu,
uru ŋgemu u ɲyɛ na fwore u zòmbilini i ke.
3 U ɲyɛ na u supyiɲɛɛnŋi mɛge kɛ̀ɛge mɛ,
u ɲyɛ na kapii pyi u shinɲɛɛ na mɛ,
u ɲyɛ na u tɛɛnɲɛɛ cyere mɛ.
4 U ɲyɛ ŋgwò na,
ná zòŋkuuŋɔ folʼe mɛ,
ŋka mpii pi ɲyɛ na fyáge Kafooŋi na ke,
u à pire pêe.
U mɛɛ ká ɲwɔmɛɛ lwɔ́ ndemu li sí ŋkɛ̀ɛgɛ nɔ u na ke,
u ɲyɛ na li fáre mɛ.
5 U aha wyɛ́rɛ fwoo le wà na,
u ɲyɛ na ɲuŋu tahara caa mɛ.
U ɲyɛ na numpire ŋkànŋkurogo shwuu si tàngafoo cɛ̂ɛgɛ mɛ.
Shinŋi u ɲyɛ amuni ke,
yafyin si n-jà urufoo cúnŋɔ si ɲjîrige u tayyerege e mɛ.