Kile mɛge mpèeŋi ná ɲjini li ɲyɛ sùpyaŋi na ke
8
Mɛceŋkuruŋke yyaha yyére shinŋi.
Nde mɛɛnʼà cêe ná Gati shiinbii ŋkɔ̀nnɔŋi i.
Dawuda mɛɛni là.
2 Kafooŋi Kile,
wuu Kafooŋi,
mu mɛgʼà pêe diɲyɛŋi cyeyi puni i!
Mu sinampʼà fànha tò nìɲyiŋi wumpe na.
3 Nàŋkopyidɔdɔɔre ná pìnpinɲyɛyi ɲwɔyi cyekurugo,
mu à ma sífente cyêe ma zàmpɛɛnbii na.
Lire e pire pi ɲyɛ na mu tunni ke,
mu maha tajwogo fo pi á.
4 Mii aha nìɲyiŋi wíi mu cyagʼà uru ŋgemu yaa,
maa yiŋke ná wɔrigii dá ke,
5 mii maha naye yibe:
Sùpyaŋi ɲyɛ ɲaha shi fo mu à yákili yaha u na yɛ?
Adama pyàŋi ɲyɛ ɲaha shi fo mu na u kàanmucaa yɛ?
6 Mu à u pyi u tayyerege ɲyɛ a mu woge kwɔ̀ sèlʼe mɛ,
mu à pèente ná ɲjire pyi u ɲùŋke na mu à jwo saanra ɲùntoŋɔ.
7 Mu à u yaha ma yadayi puni ɲuŋɔ na,
mu à yi puni le u tooyi ɲwɔhʼi:
8 mpàaabii ná nìiyi,
fo mà sà nɔ sigeyaayi na,
9 nìɲyiŋi sanɲcyɛɛnre ná lwɔhe fyaabii,
fo mà sà nɔ yaaga maha yaaga ku ɲyɛ lwɔhe e ke.
10 Kafooŋi Kile,
wuu Kafooŋi,
mu mɛgʼà pêe diɲyɛŋi cyeyi puni i!