Kile u maha u shiinbii shwuu
7
Dawuda à parage mɛɛni ndemu cêe Kafooŋi Kileá mà yyaha tíi ná Bezhamɛ tùluge shinŋi Kushi i ke.
2 Kafooŋi mii Kileŋi,
mii à naye
tíiŋɛ mu na.
Na wwû na
kyéregefeebii cye e maa na shwɔ.
3 Lire baare e,
pi sí mii sulugo sulugo bà cànraga maha yaaga sulugo mɛ.
Pi sí mii wáaga yatanɲya yatanɲya,
shwofoo sì n-ta mii na mɛ.
4 Kafooŋi,
mii Kileŋi,
mii aha nta mii à cɛ̂ɛgɛ,
mii aha nta mii à kapyimbaala pyi,
5 Mii ná shinŋi u à táan ke,
mii aha nta mii à kapii pyi uru na,
mii aha nta mii à na yukwɔnɲɛɛŋi yaaga lwɔ́ ɲùŋɔ bàa,
6 lire e ke mii zàmpɛɛnbii pi na kɔrʼa cû,
pi i na fwòoŋɔ pi tooyʼe,
pi i na ɲjini le pwoore e.
Shelaa
7 Kafooŋi,
mu lùyiriwuŋi u yîri,
mu nàvunŋɔ wuŋi u yîri maa ntùŋke taha na zàmpɛɛnbii na.
Yîri maa na tɛ̀gɛ maa yoge kyaala.
8 Supyishiŋi puni pyi u pa bínni u ma kwûulo,
maa ntɛ̀ɛn pi ɲuŋɔ na nìɲyiiŋi i ma saanre tatɛɛnge e.
9 Kafooŋi mu u maha supyishiŋi puni yoge kyaala ke,
tànge kan na á ma taanna ná na ntìiŋi ná na fyìnmpe e.
10 Tìiŋkuro kûru shinpiibii kapyiŋkii na,
maa shincɛnmpii pyi pi ndìre le.
Ɲaha kurugo yɛ,
ntìiŋi foo Kile,
mu u à sùpyaŋi sɔ̀nŋɔre ná u funŋɔ karigii cè.
11 Tɔɔnte yabeŋke ku ɲyɛ na mii shwuu ke,
kuru ku ɲyɛ Kile.
U maha zòvyinre feebii shwuu.
12 Kile yoge kwɔ̀nŋkannʼà tíi,
u lùuni maha yîri shinpiibii taan canŋa maha canŋa.
13 Ná pi ɲyɛ a pi toroŋkanni kɛ̂ɛnŋɛ mɛ,
Kile sí u kàshikwɔnŋwɔɔni jwɔgɔ,
si u sintaage dìri si zɛ̀ɛnɛŋi pyi.
14 U na supyiboyaaya bégele.
U na u tàanbii nawuubii byii.
15 Ɲyɛ,
shinpiŋi maha laani lwɔ́ maa kapiini si,
u maha ntìmbaaŋi laani lwɔ́ maa kafinaare si.
16 U maha wyicuguŋke tùgo,
ŋka u yabiliŋi maha ɲcwo kʼe.
17 U pege karigii maha ɲcwo u yabiliŋi ɲuŋʼi,
u kyanmpe karigii maha ɲcwo u yabiliŋi na.
18 Mii sí fwù kan Kafooŋi á u ntìiŋi kurugo.
Mii sí ŋkèeŋi mɛɛni cêe nìɲyiŋi u Kafooŋi á.