Kile u maha ticuumpe kaan
6
Mɛceŋkuruŋke yyaha yyére shinŋi Dawuda à mɛɛni ndemu cêe ná mɛrɛ baataanre ŋkɔ̀nnɔŋi i ke.
2 Kafooŋi Kile,
mʼàha na kíbe ntàanna ná ma lùyirini i mɛ,
mʼàha na faha ntàanna ná ma nàvunŋke e mɛ.
3 Kafooŋi,
ɲùɲaara ta na na,
ɲaha kurugo yɛ,
mii ɲyɛ fànha bàa.
Kafooŋi,
na cùuŋɔ,
ɲaha kurugo yɛ,
mii kaciiyi na mii jyìi.
4 Kafooŋi,
mii funmpɛn wuŋi sí n-kwôro,
zà nɔ fo ɲaha tère na yɛ?
5 Kafooŋi,
núrʼa pa na shwɔ,
na shwɔ ma cɛ̀nmpe kurugo.
6 Ɲaha kurugo yɛ,
bu sì n-jà raa sɔ̂nŋi mu na mɛ.
Jofoo u sí n-jà mu kêe mà urufoo yaha fanŋke e yɛ?
7 Ŋkyɛnŋʼà mii fànhe kwɔ̀,
numpilaga maha numpilaga,
mii ɲyilwɔhe maha mii yasiniŋke ɲíŋɛ.
Mii maha mɛɛ sú fo mii tasinage maha ɲíŋɛ.
8 Yyetanharʼà mii yyahe pyi kʼà wwɔ̀ mii na.
Mii ɲyiigii fànhʼà cyɛ́rɛ mii zàmpɛɛnbii kapyiŋkii kurugo.
9 Yii kapimpyiibii,
yii laaga tɔɔn na na,
ɲaha kurugo yɛ,
Kafooŋi à mii tùbilini lógo.
10 Kafooŋi à mii parage lógo,
Kafooŋi à mii ɲarage shwɔ.
11 Mii zàmpɛɛnbii puni sí n-silige si fyá sèlʼe.
Pi sí núru pi silige wuubii,
li sì mɔ mɛ.