Kile ɲyɛ na funŋɔ wwùu fànhabaa feebii na mɛ
9
Mɛceŋkuruŋke yyaha yyére shinŋi mɛɛni,
jyafooŋi ŋkwùŋi kyaa na.
Dawuda mɛɛni.
2 Kafooŋi Kile,
mii sí fwù kan mu á ná na zòmbilini puni i.
Mii sí mu kakyanhala karigii puni yyaha jwo.
3 Mii sí ɲî funntange na mu kurugo.
Mii sí mu mɛge báama ná mɛlʼe nìɲyiŋi u Kileŋi.
4 Mii zàmpɛɛnbilʼà tɛ̂rʼa núru,
pi à búrugʼa cwo,
pi à kwû mu yyahe taan.
5 Mà mu yaha ma saanre yatɛɛnŋke e,
mu à yoge kwɔ̀n ntìiŋi funŋke e.
Mu à tànga kan mii á.
6 Mu à supyishiŋi sanŋi cɛ̂ɛgɛ maa supyikyanyi wuuni kɛ̀ɛge.
Mu à pi mɛyi bò fo tèekwɔmbaa.
7 Mii zàmpɛɛnbii sàha ɲyɛ ɲyii na mɛ,
pi shi à pínni.
Mu à pi kànɲyi jya,
wà sàha ɲyɛ a pi mɛyi cè mɛ.
8 Ŋka Kafooŋi u ɲyɛ saanŋi fo tèekwɔmbaa.
U à tɛ̀ɛn u saanre yatɛɛnŋke e si yoge kwɔ̀n.
9 Uru u ɲyɛ na diɲyɛŋi kɛ̂ɛnŋi ná ntìiŋi i.
U ɲyɛ a supyishi pwɔ́ɔŋɔ supyishi na mɛ.
10 Kafooŋi u ɲyɛ cwɔ̀nrɔmɔfeebii taŋwɔhɔge,
maa mpyi pi taŋwɔhɔge yyefufe tèni i.
11 Mpii pi à mu mɛge cè ke,
pirʼà dá mu na.
Ɲaha kurugo yɛ,
Kafooŋi,
mpii pi ɲyɛ na mu caa ke,
mu sì pire yaha tèni là tufiige e mɛ.
12 Yii à ŋkêeŋi myahigii cêe Kafooŋi á,
u saanre tatɛɛnge ɲyɛ Siyɔn e.
Yii a u kabwɔhigii kyaa yu supyishiŋi sanŋi shwɔhɔlʼe.
13 Ŋge u ɲyɛ na supyire nimbonte yíbege pyi ti bofeebii na ke,
uru ɲyɛ a funŋɔ wwɔ̀ nimboompii na mɛ.
Fòŋɔfeebii pi ɲyɛ na ŋkwúuli u fyè e ke,
u ɲyɛ a funŋɔ wwɔ̀ pire na mɛ.
14 Kafooŋi,
ɲùɲaara ta na na.
Mii màpɛnge na ɲyɛ mpimu i ke,
na kyaalaŋkanni wíi pire cye e,
mu u à mii dìrʼa shwɔ kwuu kànhe tajyiɲwɔge na.
15 Bà mii si mpyi si mu kêe pyiŋkannagii puni i,
Siyɔn pworibii kànhe ɲwɔ na,
si mpyi funntange e mu mii zhwoŋi kurugo mɛ.
16 Supyishiŋi à cwo pi yabilimpii wyituguge e.
Pi tooyʼà cû pi yabilimpii kànhaŋke nimpɛrɛge na.
17 Kafooŋi à uye cyêe,
u à u katiigii kyaa jwo.
Shinpiŋʼà cû u yabiliŋi kànhaŋke nimpɛrɛge na.
Shelaa
18 Shinpiibii sí n-kàre kwuu kànha na,
mà bâra uru supyishiŋi sanŋi puni u à funŋɔ wwɔ̀ Kile na ke.
19 Ŋka Kile sì n-sìi funŋɔ wwɔ̀ fòŋɔfeebii na mɛ.
Mpii pi ɲyɛ kanhare e ke,
sɔ̀nŋɔrɔ tatahaga sì n-sìi n-fô pire na mɛ.
20 Yîri Kafooŋi!
Mʼàha sùpyaŋi yaha u fànha ta mɛ!
Yoge ku kwɔ̀n supyishiŋi sanŋi na mu ɲyii na!
21 Kafooŋi,
fyagare tîrige pi ɲuŋʼi,
sùpyire si ɲcè na pire ɲyɛ a sìi yafyin Adamapyii kàntugo na mɛ.
Shela