Saanŋi Kile à tìŋɛ ke
2
Ɲaha na kìrigilʼà ɲùŋɔ kyán yɛ?
Ɲaha na sùpyire na vùnmpwɔɔre pyi ɲùŋɔ baa yɛ?
2 Ɲaha na ɲìŋke saanbii na piye bégeli kàshige mɛɛ na yɛ?
Ɲaha na ɲìŋke ɲùŋufeebilʼà piye bínni,
maa ntùŋke taha Kafooŋi Kile ná u saanŋi niɲcwɔnrɔŋi na yɛ?
3 Pi à jwo piyʼá:
«Wuu pi yapwɔyi sànhʼa láha wuye na,
wuu u pi mɛɛre wà tatɔɔnge e.»
4 Ŋge u à tɛ̀ɛn nìɲyiŋi saanre tatɛɛnge e ke,
uru na pi cyàhali.
Kafooŋi na pi fwɔ́hɔre.
5 U lùunʼà yîri,
U lùyirinʼà pi pyi pi à fyá,
ka u u pi pyi:
6 «Mii wi ke,
mii à na Saanŋi tìŋɛ,
na ɲaŋke Siyɔn ɲuŋʼi mii à kuru ŋkemu yaha naye yahare e ke.»
7 Ɲje Kafooŋi à jwo mii á ke,
yire yi ɲyɛ ɲje:
«Mu u ɲyɛ mii jyaŋi,
niɲjaa mii à pyi mu tuŋi.»
8 Mu aha mii ɲáare
na mii i mu yaha mu u mpyi ɲìŋke sùpyire puni ɲuŋɔ na,
Ɲìŋke ɲùyi puni sí n-pyi mu wuyo.
9 Mu fànha sí n-pyi pi ɲuŋʼi tɔɔnŋɔ fiige
si pi jya jya bà wà maha pworo cwɔhii jya mɛ.
10 Ɲyɛ,
numɛ,
saanbii,
yii yákili ta
Yii pi ɲyɛ ɲùŋufeebii ɲìŋke na ke,
yii ɲɛɛ yɛrɛge na.
11 Yii a báare Kafooŋi á ná u yyahafyagare e,
Yii funtangawuubii fo na ɲcyɛ̀ɛnni,
yii yiye tîrige u á.
12 Yii niŋkure sín,
yii i u jyàŋi pêe,
bà li si mpyi,
u lùuni kà ŋkwɔ̀ n-yîri,
si yii bò kuni na mɛ.
Ɲaha na yɛ,
mpii pi ɲyɛ pi ɲyɛ a piye tîrige u á mɛ,
u lùuni sí n-yîri fwɔ fwɔ pire taan.
Mpiimu ká u pyi pi taŋwɔhɔge ke,
pire wuunʼà ɲwɔ.