Zhozuwe yɛrɛge
23
Tère nimbwoo mpyi a tòro mà kwɔ̀,
lirʼà ta Kafooŋi mpyi a Izirayɛli shiinbii yige pi zàmpɛɛnbii cye e,
pire mpiimu pi mpyi a pi kwûulo ke,
maa taŋɔŋke kan pi á.
Zhozuwe mpyi a lyɛ maa shìtɔɔnwɔ ta.
2 Ka u u Izirayɛli shiinbii puni yyere,
pi kacwɔnribii ná yyaha yyére shiinbii ná yukyaabii ná ɲùŋufeebii,
maa pi pyi:
«Mii à lyɛ maa shìtɔɔnwɔ ta.
3 Nde Kafooŋi,
yii Kileŋi à pyi ŋge supyishiŋi kuuyi puni na yii kurugo ke,
yii à lire ɲya yii ɲyiigii na.
Kafooŋi,
yii Kileŋi u à kàshige kwɔ̀n yii cyaga.
4 Ku ke,
kìni cyeyi yʼà kwôro ke,
mà bâra ɲje puni mii à tùn maa jà yi na ke,
mii à ŋkyaalwooni tɛ̀gʼa yire puni táa yii tùluyi na,
maa yii puni nàzhanŋi kan yii á,
mà lwɔ́ Zhurudɛn baŋi na mà sà nɔ fo suumpe lùbwɔhe na canŋacwumɔ yyére.
5 Kafooŋi,
yii Kileŋi sí yire cyeyi sùpyire kɔ̀rɔ n-lwɔ́ yii yyaha na si yi kan yii á yii ta bà Kafooŋi,
yii Kileŋi mpyi a yi jwo mɛ.
6 Yii yiye waha,
karigii cyi à sémɛ Musa sàliyaŋi sémɛŋi i ke,
yii i ŋkwôro cyire na,
yii raa cyi kurigii puni ɲaare,
yii àha n-fɛ̂ɛn zhà kàniŋke lire ɲyɛ mɛ kàmɛni na mɛ.
7 Supyishiŋi kuuyi yʼà tɛ̀ɛn yii shwɔhɔlʼe ke,
yii àha zìi ŋwùrugo yire sùpyire e mɛ,
yii àha zìi raa pi kilebii mɛyi yiri mɛ,
yii àha zìi raa ŋkâre pi na mɛ,
yii àha zìi raa pi pêre mɛ,
yii àha zìi raa niŋkure sínni pi taan mɛ.
8 Yii yiye pwɔ Kafooŋi,
yii Kileŋi kanni na,
bà yii à yiye pwɔ u na fo mà pa nɔ niɲjaa na mɛ.
9 Kafooŋi à supyishi kuuyo nimbwoyo fànhaɲyahaga wuyo kɔ̀rʼa lwɔ́ yii yyaha na,
fo mà pa nɔ niɲjaa na,
wà ɲyɛ a jà a yyérʼa yii sige mɛ.
10 Yii shin niŋkin mpyi maha shiin kampwoo (1.000) kɔ̀rɔ,
ɲaha kurugo yɛ,
Kafooŋi,
yii Kileŋi mpyi maha kàshige kwùun yii cyaga,
bà u mpyi a yi jwo yii á mɛ.
11 Lire e ke,
yii yaha yiye na sèlʼe,
bà yii sí n-pyi si Kafooŋi,
yii Kileŋi kyaa táan yiyʼá mɛ.
12 Yii aha ntɛ̂rʼa núru Kafooŋi ɲwɔhʼi,
supyishiŋi kuuyi sanɲyi yʼà kwôro yii shwɔhɔlʼe ke,
maa yiye pwɔ yire na,
maa cikwɔɔnre pyi ná ye,
maa wwùu ná yʼe,
13 yii tɛ̀ɛn ná lʼe,
Kafooŋi,
yii Kileŋi saha sì raa uru supyishiŋi kuuyi kɔ̀re raa lwúu yii yyaha na mɛ,
ŋka yi sí n-pyi yii á gíli ná kànhaŋa,
si mpyi kàsoro yii ŋkère na,
si mpyi ŋguro yii ɲyiigilʼe fo yii shi sí n-bò ŋkwɔ̀ nde kìni niɲcɛnni i,
Kafooŋi,
yii Kileŋi à lire ndemu kan yii á ke.
14 Mii wi ke,
mii canmpyahigilʼà kwɔ̀ a kwɔ̀.
Yii sàa li cè yii dá li na ná yii zòmpyaagii puni ná yii munahigii puni i,
na Kafooŋi,
yii Kileŋi mpyi a jwuɲcɛnmpe mpemu jwo yii á ke,
puru puni i,
pà niŋkin ɲyɛ a kwôro fûnŋɔmbaa mɛ.
U à pu puni pyi a fûnŋɔ yii á.
15 Jwuɲcɛnmpe puni Kafooŋi,
yii Kileŋi mpyi a jwo yii á ke,
puru punʼà fûnŋɔ yii á pyiŋkanni ndemu na ke,
lire pyiŋkanni ninuuni na,
jwumpimpe u à jwo yii na ke,
puru mú sí n-fûnŋɔ,
fo si yii shi bò nde kìni niɲcɛnni i,
u à lire ndemu kan yii á ke.
16 Tunmbyaare Kafooŋi yii Kileŋi à le ná yii e ke,
yii aha tire kɛ̀ɛge maa kilebii piibɛrii pêre maa niŋkure sínni pire taan,
Kafooŋi lùyirini sí n-tîge yii ɲuŋʼi si ntíi yii shi bò n-yige lire kìni niɲcɛnni i,
u à lire ndemu kan yii á ke.»